Un mercante vaise a pique tras chocar no mar do Norte con outro que navegaba rumbo á  Coruña

Varios tripulantes danse por desaparecidos tras a colisión de dous mercantes fronte a Alemaña, ao sueste do mar do Norte, entre as illas de Helgoland e Langeoog, informan axéncialas Efe e Europa Press citando comunicados dos servizos de emerxencias xermanos. Un dos cargueiros, o Polesie, con bandeira de Bahamas, navegaba rumbo á Coruña, onde prevía atracar o 28 de outubro. O outro, o Verity, de pavillón británico, iríase a pique, engaden as referidas fontes oficiais.

Por causas aínda por aclarar, o choque sucedeu ao redor das cinco da madrugada deste martes, a unhas 12 millas náuticas (22 quilómetros) ao suroeste da illa de Helgoland e a 17 ao nordés da illa de Langeoog, precisa o comunicado oficial do que se fai eco Efe. O granelero Polesie, de 190 metros de eslora, dirixíase ao porto coruñés cando se viu implicado no sinistro co Verity, tamén granelero, de bandeira británica e 91 metros de longo, que navegaba de Bremen a Immingham, no Reino Unido.

Unha persoa foi rescatada do mar e está a recibir atención médica, mentres continúa a procura das desaparecidas, sinalaron as autoridades xermanas, que dan por feito que o Verity afundiu, mentres o Polesie, con 22 tripulantes, mantense á boia. A prioridade agora é tratar de localizar aos que faltan, segundo declarou un portavoz do mando central de emerxencias, Benedikt Spangardt, ao diario Bild, apuntando que poderían ser seis mariñeiros.

Un morto e catro desaparecidos ao irse a pique un cargueiro que chocou con outro que se dirixía á Coruña

Somos Mar

Amplo despregamento en busca dos desaparecidos

Alemaña despregou un amplo operativo de procura no que participan tres buques do servizo de salvamento marítimo, un remolcador de emerxencia, unha embarcación piloto, unha lancha da policía naval e un helicóptero da mariña alemá, explica Efe. Cara ao lugar do sinistro navegaban tamén outro buque de salvamento, un de recoñecemento, procura de pecios e investigación da Axencia Federal Marítima e Hidrográfica, así como un buque polivalente da Administración de Vías Navegables e Navegación e outra lancha da policía naval.

Ademais, un avión con sensores sobrevoa a zona para obter máis información e no lugar atópase tamén un buque con persoal médico a bordo para prestar atención sanitaria. Segundo o comunicado oficial do que se fai eco Efe, no lugar do sinistro marítimo a forza do vento é de seis na escala de Beaufort (de 41 a 50 quilómetros por hora) con ondas de tres metros.

---

---

---