A área de Rural do goberno provincial axuda a explotacións de loura galega
24 oct 2025 . Actualizado á 20:27 h.As axudas á recría de gandería de raza rubia galega van a máis en Lugo. A liñas de subvencións que concede a área de Rural do goberno da Deputación chega este ano a 279 explotacións, 30 máis que no 2024, e a contía destinada acada os 232.000 euros, 40.000 máis que no pasado exercicio.
As axudas teñen máis incidencia nunhas comarcas que noutras e reflicten o peso que a gandería de raza loura ten en diversas zonas. Por exemplo, os beneficiarios son numerosos en municipios da comarca de Sarria —sobre todo, en Láncara, en Paradela e en Triacastela—, nos Ancares —principalmente en Cervantes, en Baralla, en Pedrafita e nAs Nogais— e en Lugo e arredores —Friol, O Corgo e Castroverde—, así como na Fonsagrada e en Vilalba.
A cada gandería déronselle axudas que van dos 400 aos 2.400 euros, unha cantidade que oscila en función das tenreiras reprodutoras que se crían na explotación, cun máximo de seis reses por gandería. As axudas chegan a un total de 580 animais.
O deputado responsable da área de Rural, Daniel García, destacou que o incremento das axudas, reflectido nun aumento das explotacións beneficiadas, era unha expresión do interese da Deputación polo gando vacún de carne. García referiuse a ese sector como fundamental, tanto polo seu peso económico como polo impacto ambiental favorable que xeran no territorio. Son, recalcou o deputado, «a mellor alternativa para o aproveitamento do territorio».
A resolución das axudas pode consultarse na páxina web da Deputación, así como no Boletín Oficial da Provincia (BOP) do pasado 17 de outubro. Nestes momentos está aberto o prazo de presentación de alegacións á resolución.