Medio Ambiente lémbralle ao ministerio que o estado de conservación do lobo en Galicia é favorable

O enfrontamento que manteñen a Consellería de Medio Ambiente e o Ministerio para a Transición Ecolóxica a causa da xestión do lobo continúa estes días cun cruzamento de cartas. Primeiro, foi o secretario de Estado, Hugo Morán, o que o enviou unha misiva á conselleira, Ángeles Vázquez, para lembrarlle que o lobo segue estando a considerar en España como unha especie en réxime desfavorable e que accións como a extracción de exemplares poden empeorar ese problema. Vázquez respóndelle que, en Galicia, o cánido está nun estado favorable e presente no 93% do territorio.

O recente cambio na normativa, que permitiu sacar ao lobo da Listaxe de Especies Silvestres en Réxime de Especial Protección (Lespre), abriu unha nova fronte de disputa. Segundo a carta remitida por Morán ás comunidades, o lobo non pode ser unha especie cinexética, pois en toda España segue estando considerado como en estado desfavorable de conservación. E así o recolle, ademais, unha unha sentenza do Tribunal de Xustiza da Unión Europea. Nesa mesma misiva, o secretario tamén quere saber as previsións de extraccións que ten a Xunta.

Pola súa banda, Vázquez respóndelle que a modificación do status do lobo foi «moi necesaria» porque «non se correspondía coa situación real do lobo na nosa comunidade». Tamén, engade, está en «plena coherencia co que ocorreu a nivel europeo». Neste sentido, hai que lembrar que o Parlamento europeo votará hoxe mesmo se acepta rebaixar a protección do cánido, tal e como propuxo a Comisión Europea.

Vázquez lembra que foi Europa a que apostou por rebaixar a protección da que goza o animal debido á «constatación do seu bo estado de conservación». E lembra unha recente sentenza do Tribunal Superior de Xustiza de Cantabria, que rexeitou tomar medidas cautelares contra a extracción de lobos planeada por esa comunidade. A decisión xudicial, engade a conselleira, «baséase en  que o mantemento dun estado de conservación favorable non é un límite infranqueable se non un criterio de ponderación, xunto con outros como o número de ataques do lobo e morte de gando». 

A conselleira explica nesa mesma carta que Galicia recuperou  a vixencia do plan de xestión do lobo, aprobado en xaneiro do 2009, e que quedara suspendido no 2021 como consecuencia da decisión do Gobierno de incluír ao lobo no Lespre. Ese documento é o que establece as circunstancias que se han de dar para poder autorizar as extraccións de lobo. 

Para rematar, a conselleira pide a Morán que lé remitan as cifras que van enviar a Europa para o seu exame previo por parte da consellería. Con iso queren evitar «que se volva a producir o desaxuste do último envío, xa que nesa ocasión os datos enviados a Europa non coincidían cos achegados polas comunidades autónomas», conclúe. 

---

---

---