«Silleda», a tenreira mariñá que naceu por sorpresa na feira da Semana Verde
GANDERÍA
O seu dono, o gandeiro mindoniense Nando López, acudiu para os certames da raza cachena e non contaba co parto ata dentro duns días
04 jun 2024 . Actualizado á 09:54 h.O destino quixo que, no canto de na explotación de Couboeira (Mondoñedo), a tenreira Silleda chegase ao mundo este domingo en plena Feira Internacional Abanca Semana Verde de Galicia. Por ser este o lugar de nacemento e seguindo o costume xa practicado con outros animais, Davide Outeiro, veterinario de Boaga, propuxo que levase o nome da localidade que acolle o recinto, segundo relata o criador e dono de ambos os exemplares, o gandeiro Nando López.
Entre os máis sorprendidos, o seu propietario, que acudiu á feira con dúas vacas de raza cachena, unha con nena e outra —Vela— cuxo parto non estaba previsto ata dentro duns días.
«O domingo estaba no hotel e alí me chamaron para dicirme que a vaca estaba de parto. Collín o coche e saín para o recinto. Afortunadamente foi todo ben e acabamos de atendela xusto no momento en que empezaba a xente a entrar no recinto. Foi toda unha atracción, sobre todo entre os nenos!», recoñece o gandeiro: «Onte (polo domingo) estiveron todo ou día vacilándome: ‘Papá, que tal foi o parto?’».
Á sorpresa do dono seguiulle a expectación que creo entre o público. «Estaba tranquilo porque non recinto hai veterinarios e as instalacións están moi ben condicionadas e son quentiñas», recoñecía Nando López, quen considera que Silleda sempre terá un lugar de referencia por nacer durante a Semana Verde.
Para a nai da tenreira, unha vaca de catro anos, o do domingo foi o seu segundo parto. Procede da gandería de Cachenas de San Breixo, de Triacastela, e foi adquirida por Nando cando era aínda unha tenreira.
Ademais de con outro exemplar de cachena que suma á súa gandería —doce exemplares, co touro—, Nando López tamén regresou a Mondoñedo cun premio. A Federación de Razas Autóctonas Galegas ratificou os resultados do XI Concurso Morfolóxico Raza Cachena, no que a cachena de Nando, de nome Choiva, sumou 88 puntos e alzouse co segundo premio. Este exemplar tamén foi adquirido polo seu propietario á gandería antes mencionada de Triacastela.
Na Feira Internacional Abanca Semana Verde —que se desenvolveu entre o 30 de maio e o 2 de xuño—, este gandeiro mindoniense tamén participou con Breogán, un dos seus exemplares, en varios certames morfolóxicos e de manexo de porco celta, outra das razas que cría na súa explotación de Couboeira, así como cun expositor de artigos que elabora coa produción das dúas razas, e que comercializa no mercado baixo a marca Celtagal.