Os exemplares, de gran tamaño, contiñan outro no seu interior
26 abr 2021 . Actualizado ás 09:34 h.Un novo prodixio da natureza sorprendeu no agro lucense, nesta ocasión, con dous ovos xigantes que puxo unha galiña do Corgo. Ademais do seu tamaño, o dobre do habitual, segundo afirma o propietario do galiñeiro, o máis sorprendente chegou ao romper o primeiro ovo, do que saíu outro intacto.
José López é o dono da prodixiosa galiña, que nunca antes puxera ovos desas características. «É unha pita do ano pasado e ata agora poñía ovos normais. Hai tres semanas vimos que lle custaba poñer, e finalmente puxo dous ovos grandísimos, o dobre do tamaño que teñen normalmente. E desde entón, outra vez seguiu poñendo os ovos coma sempre», continúa José.
Este veciño, residente en Lugo, conta cunha propiedade na parroquia de Anseán, no Corgo, onde ten varias galiñas. Nin José nin os seus veciños saían do seu asombro ao comprobar o tamaño de ambos os ovos. Pero a súa sorpresa foi maiúscula cando decidiu abrir o primeiro deles: «Estaban a clara e a xema intactas e, a maiores, outro ovo de tamaño normal dentro, tamén coa súa xema e a súa clara intactas», continúa. Coma se dunha matrioska tratásese.
Un fenómeno pouco común, pero do que se contan numerosos exemplos por toda a xeografía galega. Aínda que talvez o caso máis mediático chegou fai un par de anos, co popular cociñeiro Karlos Arguiñano, que se topou, facendo o seu programa de cociña na televisión, cun ovo dentro doutro; o seu vídeo fritindo o dobre ovo fíxose viral.
O ovo rematou en tortilla
Non parece que o achado do Corgo vaia a chegar a tanto. Pero o caso é que, tras recuperarse do seu asombro, José López decidiu facerse unha tortilla co dobre ovo e dar boa conta dela xunto coa súa muller.
