Comunidades de montes defenden en Friol a convivencia entre gandería e sector forestal: «Estamos todos no mesmo barco»
FORESTAL
A asociación Movegandex preséntase cunha defensa do traballo de comuneiros na conservación da biodiversidade e na prevención de incendios
08 nov 2025 . Actualizado á 16:52 h.O proxecto Movegandex xa está en marcha. A iniciativa pola que oito comunidades de montes (unha de Lugo, tres da Coruña e catro de Pontevedra) que teñen en común a presenza de gandería en réxime extensivo nos seus terreos presentouse este venres en Friol, municipio ao que pertence a de Carballo, única lucense que se sumou por agora a unha iniciativa na que agarda a incorporación de máis colectivos semellantes. Un das mensaxes máis destacadas da xornada foi a defensa da convivencia entre gandeiros e propietarios do sector forestal sen que os seus intereses entren en colisión.
«Estamos todos mesmo barco», dixo Ovidio Queiruga, presidente da comunidade de montes de Baroña (Porto do Son) e primeiro presidente de Movegandex. Nesa mesma liña expresouse a conselleira de Medio Rural, María José Gómez: «Propietarios forestais e gandeiros poden e deben ir da man», afirmou, destacando ademais que uns e outros poden aspirar ao obxectivo de vivir no medio rural e do medio rural. A conselleira subliñou que a gandería en extensivo era unha eficaz garantía para ter o monte limpo, mentres que a actividade forestal eleva as rendas de quen vive na contorna.
Queiruga aproveitou o acto para expor algúns dos obxectivos dunha iniciativa que, dixo, «naceu dunha necesidade». Lembrou que as comunidades de montes, co pastoreo que practican, favorecen a sustentabilidade, frean o crecemento da biomasa e reducen o risco de incendios. Para continuar nesa liña, agregou, necesítase colaboración en novas fórmulas de xestión, formación para os comuneiros e propiciar relacións de colaboración entre estas entidades, que definiu como básicas para a sustentabilidade de zonas rurais.
«Tedes que ir todos da man»
Ángel Buján, presidente da comunidade de montes friolesa e secretario de Movegandex, mostrouse convencido de que irían incorporando máis entidades. Friol foi elixido como sede do acto de presentación porque a sede da nova asociación está en Carballo, e o alcalde, José Ángel Santos, prometeu o apoio do Concello e deu un consello aos membros da recentemente creada entidade: «Creo que tedes que ir todos da man», afirmou, pois así será máis doado o propósito de «manter un monte vivo».
Rosa Mosquera, catedrática do Departamento de Produción Vexetal e Proxectos de Enxeñaría da USC e docente na Escola Politécnica Superior do campus de Lugo, lembrou que a presenza de gandería extensiva e de actividade forestal non era senón un regreso a prácticas habituais hai décadas: «Non estamos descubrindo nada, estamos redescubrindo», explicou.
Estas son as comunidades de montes participantes no proxecto:
- Carballo (Friol): 700 hectáreas; gando cabalar, caprino e porcino; colmeas.
- Raño (Irixoa): 364 hectáreas; gando cabalar; colmeas.
- Esteiro (Muros): 580 hectáreas; gando vacún e cabalar.
- Baroña (Porto do Son): 878 hectáreas; gando caprino, vacún e cabalar; colmeas.
- Camposancos (A Guarda): 76 hectáreas; gando caprino.
- Meira (Moaña): 450 hectáreas; gando caprino.
- Vincios (Gondomar): 640 hectáreas; gando caprino e vacún; colmeas.
- Santa Mariña (O Rosal): 1.557 hectáreas; gando caprino.