A UE e Ucraína acordan as bases dun novo marco de libre comercio para produtos agrícolas

A Comisión Europea e Ucraína chegaron este luns a un acordo de principio para «revisar e modernizar» a zona de libre comercio de alcance amplo e profundo (Zlcap) que permitirá unha apertura parcial e progresiva no sector agrícola, seguindo a liña das exencións temporais que se deron a Kiev tras a invasión rusa pero que inclúen novas salvagardas para protexer a sectores europeos sensibles.

Segundo detallaron nunha rolda de prensa en Bruxelas os comisarios de Comercio e de Agricultura, Maros Sefcovic e Christophe Hansen, respectivamente, en virtude do novo marco, Ucraína deberá adaptar gradualmente as súas normas de produción agrícola ás da UE como moi tarde no 2028, en liña cos obxectivos de adhesión.

Entre os estándares aos que deberá adaptar a súa produción Ucraína figuran os de benestar animal, o uso de praguicidas e o de medicamentos veterinarios. Ademais, o país deberá informar anualmente os progresos nesta materia.

Ademais, indicou Sefcovic, establécese un «sólido mecanismo de salvaguardia para protexer os mercados da UE, especialmente cando as importacións poderían causar graves dificultades a nivel da UE ou dos Estados membro»; á vez que se «amplía as oportunidades comerciais para os produtos agroalimentarios».

No caso dos produtos sensibles, como os ovos, o azucre e o trigo, as cotas aumentan, pero mantéñense por baixo dos volumes comerciais históricos para garantir a estabilidade do mercado da UE, segundo indicaron fontes comunitarias. No caso dos produtos menos sensibles, como leite fermentado ou outros, os continxentes aumentarán progresivamente, mentres que algúns produtos se liberalizarán por completo.

Ambas as partes tamén acordaron explorar medidas para axudar aos exportadores ucraínos a chegar aos seus mercados tradicionais en terceiros países.

---

---

---