Morre en Ourol un operario de 48 anos tras caer dun camión de recollida de lixo no seu primeiro día de traballo

Un traballador faleceu de madrugada no municipio mariñán de Ourol tras caer dun camión que facía a recollida do lixo. Desde o 112 indicaron que foi unha dotación de Urxencias Sanitarias de Galicia-061 a que deu a voz de alarma ao redor das 5.30 horas. Nese momento, precisan, a vítima estaba a traballar no servizo de recollida na Rúa da Igrexa. 

Desde a central de emerxencias manifestaron que nada se puido facer polo traballador, xa que quedou inconsciente tras caer do vehículo. Solicitaron a intervención da Garda Civil e de efectivos de Protección Civil local, que se persoaron no lugar.

Xa desde o primeiro momento varias fontes indicaban no lugar que o falecido, de 48 anos, era veciño de Bravos e que o de hoxe era o seu primeiro día de traballo na empresa Servicios dos Concellos Galegos, que realiza neste concello a recollida de residuos, tanto orgánicos como de envases. Este extremo puido ser confirmado por La Voz coa empresa, que indicou que a deste martes 1 era a primeira xornada laboral do operario para cubrir vacacións de verán. No vehículo, ademais do traballador falecido viaxaba outro operario e o condutor, segundo as mesmas fontes. Desde a firma non quixeron realizar manifestacións á espera de como avance a investigación para aclarar as causas que rodearon o suceso.

O alcalde ourolense, José Luis Pajón, asegurou que os feitos se rexistraron a escasos metros da igrexa de Santa María de Ourol e que o corpo do falecido foi trasladado a Lugo para realizarlle a autopsia. 

---

---

---