A Xunta pon en marcha un calendario para combater a flavescencia dourada nos viñedos ourensáns

A flavescencia dourada é unha enfermidade moi coñecida polos viticultores ourensáns. Cando aparece pode acabar con boa parte das colleitas e o insecto que a transmite acadará a semana que vén a fase biolóxica na que pode infectar os viñedos. «Esta enfermidade é mortal para as cepas infectadas», alerta un comunicado difundido este mércores pola Consellería do Medio Rural, que anunciou o calendario de tratamentos e os produtos fitosanitarios autorizados para combater este problema.

Ata a data, na provincia de Ourense hase constatado a presenza de da flavescencia dourada en distintas áreas dos concellos de Arnoia, Cortegada, Gomesende, Padrenda, Pontedeva, Quintela de Leirado e Ribadavia. «Esas deteccións provocaron que a Consellería do Medio Rural establecese zonas tampón nas cales hai que extremar a vixilancia, impoñendo a realización de tratamentos fitosanitarios co obxectivo de impedir o avance da enfermidade. Esas zonas tampón comprenden xa a maior parte dos viñedos da D. O. Ribeiro», indica o comunicado da Xunta, que avanza que, como en Portugal tamén confirmaron a presenza desa enfermidade nas proximidades da fronteira coa comarca de Monterrei, «as áreas de produción desa comarca pasan a considerarse zona tampón, polo que nelas establécense as mesmas obrigas relativas á aplicación de tratamentos insecticidas». Onte mesmo, técnicos de Medio Rural deron unha charla en Verín sobre este asunto aos viticultores da zona. Nos próximos días están previstas xornadas informativas dese tipo en Cenlle, Beade, Leiro, Cortegada, Arnoia, Carballeda de Avia, Ribadavia e Castrelo de Miño. Nelas preténdese ofrecer as respostas necesarias sobre os produtos indicados para combater a enfermidade así como a súa correcta aplicación.

---

---

---