Máis de 80 profesionais participan no Salón dos Viños e Augardentes de Galicia en Dinamarca
AGRICULTURA
A asociación que aglutina aos consellos reguladores galegos promociona 150 elaboracións e 25 destilados galegos nun evento apoiado pola Xunta e celebrado en Copenhague
12 jun 2025 . Actualizado á 10:05 h.O restaurante TRIO de Copenhague acolleu esta mañá o Salón dos Viños e Augardentes de Galicia en Dinamarca, no que máis de 80 profesionais do sector —entre eles catadores, distribuidores e xornalistas especializados— puideron degustar 150 referencias de viños das denominacións de orixe galegas (Monterrei, Rías Baixas, Ribeira Sacra, Ribeiro e Valdeorras) e 25 referencias de destilados amparados polas Indicacións Xeográficas de Augardentes e Licores Tradicionais de Galicia.
O evento foi organizado pola Asociación de Consellos Reguladores Vitivinícolas Galegos e das IXP Augardentes e Licores Tradicionais de Galicia (Acruaga), co apoio da Xunta de Galicia a través do IGAPE, e en colaboración coa Unión Española de Catadores (UEC).
Acruaga contou co respaldo institucional da Embaixada de España en Dinamarca, representada polo embaixador Salvador Rueda Rabanal, xunto a Ignacio Jiménez, conselleiro de Turismo, e Antonio Solesio, conselleiro de Emprego. Tamén asistiu Cristina Pérez Bermejo, responsable do Departamento de Produtos Agroalimentarios do ICEX en Dinamarca.
O obxectivo do salón foi mostrar ao público profesional a calidade e diversidade dos produtos vitivinícolas e destilados galegos. Esta acción enmárcase nun convenio entre Acruaga e Igape para reforzar a visibilidade, divulgación e internacionalización do sector tanto en España como no estranxeiro.