A cota de neve descenderá este xoves ata os 900 metros
19 nov 2025 . Actualizado á 14:45 h.Unha masa de aire ártico chega a Galicia coa súa correspondente baixada das temperaturas. Os graos xa comezaron a descender na comunidade, aínda que acadarán o seu extremo este xoves. Explican desde Meteogalicia que tanto as máxima como as mínimo experimentarán un declive de entre tres e cinco graos, situándose ao redor dos nove ou dez no interior do territorio, con zonas nas que se poden chegar a ver xeadas. Aínda que no litoral serán máis altas, o servizo meteorolóxico cualifícaas como baixas para a época do ano.
«Este episodio ten a particularidade de que, aínda que durará moi pouco, fará que as temperaturas por amais dos 15 graos que tivemos días atrás descendan bruscamente ata situarse por baixo dos dez», explican desde Meteogalicia. A baixada será progresiva, aínda que aseguran que nas zonas altas e nalgúns vales do sur de Lugo as temperaturas están moi próximas aos cero graos.
En Lugo, por exemplo, as temperaturas oscilarán entre os 2 e os 9 graos; en Vigo, entre os 7 e os 14; en Ferrol, entre os 6 e os 12; en Santiago, entre os 4 e os 11; en Pontevedra, entre os 4 e os 13; na Coruña, entre os 9 e os 12; e en Ourense, entre os 2 e os 13.
Desde a tarde deste mércores haberá choivas intermitentes, máis probables na metade norte que na sur, aínda que á noite deixarán de estar tan presentes. Estes chuvascos deixarán neve a unha altura de 1.300 metros, cota que descenderá o xoves ata os 900 metros. «Poderemos ter uns flocos en zonas como as montañas de Lugo», detallan desde o servizo meteorolóxico.
A probabilidade de choiva baixa de cara ao venres, aínda que o tempo cambiará de cara ao fin de semana. Desfarase o corredor de ventos do norte e entrará unha fronte de aire cálido e húmido que traerá ventos do suroeste e choivas para toda Galicia. O sábado, como hai vento do suroeste, serán máis intensas por esa zona.