Galicia despídese do verán: baixan as temperaturas e chegan as primeiras precipitacións
SOCIEDADE
O outono adiantouse este ano debido a que o anticiclón dos Azores retirouse cara ao sur antes do previsto
06 sep 2025 . Actualizado á 05:00 h.O verán di definitivamente adeus a Galicia, aínda que o outono non comezará de xeito oficial ata o próximo 22 de setembro. E é que a baixada das temperaturas e a maior frecuencia das precipitacións serán xa unha constante a partir da semana que vén. De feito, esta mesma noite haberá un anticipo do que está por vir: cara ás 21.00 horas chegará unha fronte borrascosa que deixará choivas de intensidade moderada en toda a comunidade polo menos ata o domingo de madrugada.
A isto hai que sumarlle a alerta amarela activada por Meteogalicia entre as 21.00 horas do sábado e as 03.00 do domingo na Mariña e o noroeste e oeste da Coruña por ventos superiores aos 80 quilómetros por hora. Un aviso similar manterase no mesmo intervalo de tempo en toda a costa atlántica debido á circulación de ventos de forza 7 (de entre 50 e 60 quilómetros por hora).
Por fortuna, mañá o tempo mellorará moderadamente e os chuvascos matinais irán dando paso a ceos máis abertos e despexados a medida que avance a xornada, aínda que os termómetros sufrirán un lixeiro descenso. Así, as máxima non superarán os 24 graos en ningún punto de Galicia, salvo en Ourense, onde o mercurio marcará como moito 26 graos. En canto ás mínimo, situaranse entre os 13 e os 16 graos.
«Este ano o outono empezou un pouco cedo, pode que incluso na primeira semana de agosto. O tempo agora xa é máis inestable e as temperaturas están por debaixo da media. Outros anos, o verán continuaba ata a segunda quincena de setembro», apuntan os especialistas de Meteogalicia. Unha situación que é en gran parte responsabilidade do anticiclón dos Azores, que actúa como barreira contra as borrascas e que, ao retirarse cara ao sur antes do previsto, permite que as frontes entren con maior facilidade por Galicia.
Únete á nosa canle de WhatsApp
Así, a partir do luns, case todos os días haberá precipitacións illadas —sobre todo na fachada atlántica, desde Estaca de Bares ata a desembocadura do Miño— que virán acompañadas de temperaturas máis frías para o que é habitual nesta época do ano. «Non serán chuvias moi persistentes, senón máis ben chuvascos. O tempo será inestable, revolto e cambiante, típico do comezo do outono», indican desde Meteogalicia.