O Lenacapavir está deseñado para inhibir o VIH en varias etapas do seu ciclo de vida e non presenta resistencia cruzada coñecida in vitro con outras clases de fármacos existentes
28 ago 2025 . Actualizado á 14:50 h.A Unión Europea aprobou o uso de Lenacapavir, un fármaco inxectable do laboratorio Gilead que prevén as infeccións por VIH durante seis meses. A autorización das autoridades europeas prodúcese tras a aprobación por parte da Administración de Alimentos e Medicamentos de EE UU en xuño, así como a publicación de directrices da Organización Mundial da Saúde (OMS) en xullo que recomendaron o seu uso como unha opción para a prevención do VIH.
As autoridades europeas, que aprobaron o uso do fármaco pola vía de urxencia baseándose no éxito dos ensaios realizados polo laboratorio e ao consideralo «de grande interese para a saúde pública». Os datos avalan a celeridade para pór este tratamento a disposición pública.
Segundo explica Jean-Michel Molina, «con ao redor de 25.000 novos diagnósticos de VIH cada ano na UE e no Espazo Económico Europeo, está claro que as opcións de prevención actuais non funcionan para todas as persoas que as necesitan ou desexan, especialmente entre as poboacións vulnerables». E, engade o experto, «o réxime de dosaxe semestral e a súa alta eficacia poderían ser a opción transformadora de prevención do VIH que estabamos a agardar en Europa».
O mecanismo
O Lenacapavir actúa como inhibidor da cápside do VIH-1 en múltiples etapas o que o distingue doutras clases de axentes antivirais actualmente aprobadas. Mentres que a maioría dos antivirais actúan nunha soa fase da replicación viral, Lenacapavir está deseñado para inhibir o VIH en varias etapas do seu ciclo de vida e non presenta resistencia cruzada coñecida in vitro con outras clases de fármacos existentes.
Está a avaliarse o fármaco como unha opción de acción prolongada en múltiples estudos clínicos en curso e planificados, tanto en fases iniciais como avanzadas, dentro do programa de investigación de Gilead en prevención e tratamento do VIH.
Está a desenvolverse como base para posibles futuras terapias contra o VIH, co obxectivo de ofrecer opcións orais e inxectables de acción prolongada, con distintas frecuencias de dosaxe, en combinación ou en monoterapia, que respondan as necesidades e preferencias individuais das persoas e comunidades afectadas polo VIH. A revista Science nomeou a Lenacapavir como o «Avance do Ano 2024».
Gilead ten agora previsto presentar solicitudes ante as autoridades regulatorias de países de ingresos baixos e medios, aproveitando esta avaliación para acelerar os prazos de revisión. Entre elas figuran a de 18 países que representan o 70% da carga do VIH dos 120 países incluídos nos acordos de licenzas voluntarias previamente anunciados polo laboratorio farmacéutico.