A capital rexistrou este xoves os 38 graos, a temperatura máis alta para un mes de maio
29 may 2025 . Actualizado á 19:37 h.O episodio de temperaturas extremas que afecta estes días a España hase deixado notar en Galicia na zona do Miño de Ourense. A máxima acadada este xoves, segundo os rexistros de Meteogalicia, foi de 38,1 graos en Leiro, aínda que foi a cidade de Ourense a que logrou unha marca de calor para o mes de maio, con 38 graos. Tamén se acadaron valores extremos en Remuíño (37,4) e Monforte (36,2). Non se superaron, iso si os 39,1 graos acadados en Remuíño no 2017, nin os 38,2 que se rexistraron en Leiro no 2012.
Para este venres, os avisos de calor seguen activados na zona do Miño de Ourense, onde agarda que superen de novo os 36 graos, e ademais hai alerta por tormentas fortes no centro de Lugo que se poden dar ao longo da tarde, entre as 15 e as 21 horas.
No resto de Galicia as temperaturas manteranse un pouco por baixo das deste xoves, excepto nas zonas onde se prevé néboa costeira durante todo o día, que será máis persistente na costa norte e noroeste. Isto fará que na Coruña, por exemplo, non se superen os 21 graos.
E fóra da comunidade, máis da metade de España estará este venres en aviso por tormentas e calor, e a alerta en Sevilla elévase a laranxa, xa que se prevé que acaden os 40 graos.
Este sábado Galicia continuará baixo a influencia de altas presións, aínda con certa inestabilidade. A nebulosidade irá crecendo pola tarde, o que podería deixar algúns chuvascos tormentosos en zonas altas. As temperaturas seguirán sendo altas en Pontevedra e Ourense, por amais dos 30 graos —aínda que xa non hai alertas previstas—, mentres que o norte non acadarán os 25.
Xa para o domingo, as altas presións retiraranse gradualmente cara ao leste da Península Ibérica. Con iso, teremos máis nubes na metade norte sen descartar algo de orballo na Mariña, e ceos máis despexados no resto de Galicia. As temperaturas sufrirán un lixeiro a moderado descenso, especialmente as máxima.
O panorama cambiará xa para principios da próxima semana, porque o anticiclón desaparecerá e hai moitas posibilidades de que o martes e o mércores entren as choivas. Ademais, as temperaturas baixarán significativamente.