Chega o primeiro episodio de altas temperaturas á Península: a Aemet advirte de máxima de ata 42 graos
SOCIEDADE
O norte de Galicia quedará á marxe deste episodio grazas ao fluxo de correntes de aire fresco setentrional
26 may 2025 . Actualizado á 16:47 h.A Axencia Estatal de Meteoroloxía (Aemet) anunciou que a partir deste luns, 26 de maio, España estará baixo a influencia dun episodio de altas temperaturas durante toda a semana, con valores que acadarán os 38 °C no val do Guadalquivir e os 35 °C no do Guadiana. Así, o luns continuará o tempo anticiclónico estable na maior parte do país, con predominio de ceos pouco nubrados ou despexados. Unicamente daranse ceos nubrados no extremo norte peninsular, con precipitacións débiles e dispersas no Cantábrico que tenderán a ir a menos ao longo do día, á vez que se irán abrindo cada vez máis claros.
O aumento das temperaturas será bastante xeneralizado e progresivo durante os próximos días. O martes os valores serán similares aos acadados este luns, e a partir do mércores 28 é probable que a presenza dunha dana entre Canarias e o golfo de Cádiz induza un vento de compoñente sur que arrastre unha masa de aire cálido, seco e con po en suspensión, de orixe africana, primeiro sobre Andalucía e o mar de Alborán e posteriormente sobre o centro peninsular.
Como consecuencia, producirase un aumento adicional das temperaturas, con valores propios do verán e, por tanto, claramente máis altos das habituais nestas datas. As zonas máis afectadas serán o cuadrante suroeste peninsular, zona centro e o val do Ebro. O norte de Galicia e área Cantábrica quedarán á marxe deste episodio debido ao fluxo fresco do norte.
Os días álxidos deste episodio serán probablemente o xoves 29 e o venres 30, cunhas temperaturas máximas ao redor dos 35 °C na meseta norte, 37 °C nos vales do Ebro e do Texo, 39 °C no baixo Guadiana e 40 a 42 °C no Guadalquivir. Pola súa banda, as temperaturas mínimas tamén subirán durante este episodio, pero de forma máis lenta e menos intensa. O xoves e o venres serán superiores aos 20 °C en zonas do cuadrante suroeste; e o sábado, en amplas zonas da metade sur, do centro peninsular e do val do Ebro.
Para rematar, a Aemet sinala que a incerteza da situación meteorolóxica aumenta de cara ao fin de semana, polo que é difícil precisar o fin deste episodio. É probable que a partir do sábado 31 aumente a inestabilidade atmosférica, que podería dar lugar a un aumento da nebulosidade e a algunha tormenta, o que xunto á posible calima provocaría o inicio dun descenso das temperaturas.