A Xunta activou este nivel de alerta por temporal costeiro para este xoves nas costas da Coruña e Pontevedra, onde suspendeu tamén a actividade deportiva federada no mar
19 mar 2025 . Actualizado á 18:21 h.A borrasca Martinho achégase este xoves a Galicia, polo que a Xunta activou a alerta laranxa por temporal costeiro nas provincias de Pontevedra e A Coruña. Agarda vento de ata forza nove, de temporal forte segundo a escala Beaufort, e ondas que poderían chegar ata os sete metros. Esta entrará en vigor a partir das 5.00 da madrugada deste xoves e manterase ata as 15.00 horas nas Rías Baixas e as 17.00 na Costa da Morte. En ambas as zonas, o goberno autonómico suspendeu a actividade deportiva federada no mar.
Ademais, Meteogalicia activou avisos amarelos para as mesmas zonas xa desde as 3.00 horas, que continuarán ata despois de que remate a alerta da Xunta. Os avisos, por ondas superiores aos catro metros e mar de vento de forza sete, desactivaranse ás 18.00 horas na costa pontevedresa e ás 21.00 da noite na coruñesa. E é que agarda que o xoves sexa o día con máis vento do período de influencia de Martinho sobre Galicia.
A borrasca situarase esta xornada ao oeste de Fisterra, moi preto da costa, polo que en terra o vento tamén soprará con grande intensidade, sobre todo a primeiras horas do día. Practicamente toda Galicia estará en aviso amarelo entre a medianoite deste mércores e as 9.00 da mañá do xoves por refachos que poderían superar os 70 ou 80 quilómetros por hora. De madrugada, entre as 3.00 e as 6.00 horas, aumentará a grao laranxa, xa que a previsión é que o vento supere os 100 quilómetros por hora. Só o sur de Ourense mantense sen ningún aviso meteorolóxico activado.
Máis probabilidade de choiva cara á noite
A previsión é de ceos que alternarán nubes e claros con chuvascos ocasionais, que serán máis intensos e frecuentes, cara á noite, canto máis ao suroeste da comunidade. Ademais, agarda un lixeiro descenso das temperaturas na metade oeste do territorio, que de todos os xeitos terá temperaturas primaverais, con máxima ao redor dos 18 graos e algo máis frías na provincia de Lugo. Nos termómetros notarase sobre todo a últimas horas do día, cando, en caso de precipitacións poderían ser incluso en forma de neve en zonas altas.
A Xunta lembra a importancia de afastarse das zonas de costa mentres estea activada a alerta por temporal costeiro, como praias, paseos marítimos ou diques. Tamén chama a evitar realizar actividades no mar, cando non sexan estritamente necesarias, e asegurar as embarcacións. E, en terra, advirte á poboación que teña coidado con obxectos que poida arrastrar o vento e con posibles desbordamentos, ademais de instar a non deterse a sacar fotografías en zonas sensibles a ser acadadas pola ondada.