Representantes dos enfermos de Esclerose Lateral Amiotrófica, que o mércores se fotografaron con deputados dos distintos grupos parlamentarios, e onte fixeron o propio na Moncloa co presidente do Gobierno e os ministros de Dereitos Sociais e Sanidade, destacaron o papel que tiveron parlamentarios de Sumar para que as negociacións chegasen a bo porto, mantendo a esencia da loita de anos e abrindo a porta a outros enfermos.
Despois de tantos esforzos topáronse con que había sobre a mesa tres proposicións distintas e se os partidos se empeñaban en seguir adiante coas súas posicións non había lei, porque obviamente, non se pode regular unha cuestión de tres xeitos distintos.
Por unha banda estaba a de Junts, que era a que máis se axustaba ao que pedían as entidades encabezadas por ConELA. Por outra a do PSOE, que cualificaron como «bastante mellorable» en practicamente todos os aspectos. E, en «unha posición intermedia», a do PP. De aí a importancia do papel de Sumar, que logrou conxugar as diferenzas e sacar un texto aceptado polos catro partidos e incluso polo resto de grupos parlamentarios. «Cando queren ponse de acordo», destacou respecto diso o coordinador de AgaELA, Francisco Díaz, para quen incluso este episodio pode servir para «rexenerar a confianza» na política.