Bruxelas abre unha investigación formal a TikTok para analizar a súa protección aos menores
SOCIEDADE
Quere pescudar ata que punto a rede social chinesa xera adiccións entre os adolescentes
19 feb 2024 . Actualizado ás 17:30 h.A Comisión Europea abriu este luns unha investigación formal contra TikTok para analizar se está a protexer suficientemente aos menores e ver se está a cumprir cos novos requisitos de transparencia sobre a moderación de contidos que Bruxelas esixe ás plataformas dixitais. O Executivo comunitario xa lle pediu a TikTok información o pasado setembro para saber que medidas estaba a tomar respecto diso e hoxe decidiu abrir unha investigación formal, segundo anunciou nun comunicado.
A lei de servizos dixitais que a Unión Europea aprobou o ano pasado obriga ás grandes compañas de Internet a garantir que os seus sistemas algorítmicos non mostran contido daniño para os usurarios e, en concreto, Bruxelas quere analizar ata que punto a rede social chinesa xera adiccións.
A Comisión asegurou que a apertura da investigación formal, para a que non existe un prazo máximo, non prexulga o resultado da mesma, aínda que advertiu de que podería tomar medidas cautelares contra a rede social se o considerase necesario.
O gardián de acceso
A principios de mes, o Tribunal Xeral da Unión Europea rexeitou o recurso da empresa ByteDance, matriz de TikTok, contra a decisión da Comisión Europea de designala como «gardián de acceso» baixo a normativa dos mercados dixitais.
O pasado setembro, a Comisión designou a ByteDance como controlador de acceso baixo a regulación dos mercados dixitais xunto con Alphabet, Amazon, Apple, Meta e Microsoft. Aos seis «gardiáns» déronselles seis meses para garantir o cumprimento das obrigacións da normativa europea (DMA) para cada un dos seus servizos de plataforma central designados.
En virtude da Lei de Mercados Dixitais, a Comisión Europea pode designar plataformas dixitais como «gardiáns de acceso» se ofrecen unha pasarela de acceso importante entre as empresas e os consumidores en relación cos servizos básicos de plataforma.