Só 180 establecementos adheríronse a un programa que inclúe revisións gratuítas para os pacientes
04 may 2022 . Actualizado á 14:13 h.No ano 2007 o Sergas asinou un convenio cos centros ópticos, que contou co visto e prace do colexio profesional de ópticos-optometristas de Galicia, polo que estes establecementos realizaban exames visuais gratuítos aos pacientes e subíanos ao historial clínico do usuario. Se o médico de cabeceira comprobaba que era precisa unha revisión co especialista, derivaba ao enfermo ao hospital. «Ollo cos ollos», que así se chamaba, suspendeuse no 2020 tras unha asemblea do colexio no que se decidiu romper este acordo.
Pasados uns meses o Sergas puxo en marcha outro programa, «Coida os teus ollos», co mesmo fin pero sen a aprobación do colexio profesional. Desde entón xurdiron as voces discrepantes no colectivo ata o punto de que se puxo en marcha un grupo de protesta, denominado Plataforma Optometría en Atención Primaria Xa, que denuncia as ineficiencias deste convenio.
Segundo estes profesionais o número de centros adheridos pasou duns 600 no anterior convenio a 180 no actual, o que obriga aos pacientes para desprazarse e cambiar a súa óptica de confianza. Na provincia da Coruña hai 92, pero en toda a provincia de Lugo, por exemplo, só hai 13. A maioría dos concellos do interior non contan con este servizo e os profesionais demandan ao Sergas que negocie co colexio unha mellora das condicións deste acordo (non hai ningunha contraprestación económica), e que cree prazas na sanidade pública.
O colexio creou xa unha comisión para tratar este tema, na que están integrantes da plataforma, e de momento hai un mesmo número de membros a favor e en contra do convenio. Os profesionais tamén se queixan de que o Sergas está a chamar aos pacientes para cancelar as súas citas co oftalmólogo e derivalos ás ópticas, «pretenden que os ópticos optometristas fagan o traballo de maneira totalmente gratuíta, lograr que as listas de espera diminúan e así esconder debaixo da alfombra a falta de persoal sanitario contratado no servicio público de saúde», conclúen.