A Aemet confirmou que o pasado xuño foi un mes máis frío do normal en España
05 jul 2024 . Actualizado á 16:30 h.A meteoroloxía é unha ciencia de sensacións. E neste sentido, os datos case sempre contrastan coa nosa sensación. Con todo, os rexistros de xuño si coinciden coa opinión xeneralizada sobre como foi o pasado mes. A delegación galega da Aemet confirmou que a temperatura media presentou anomalías negativas nalgunhas estacións como, por exemplo, A Coruña, sobre o período de referencia 1991-2020. É dicir, foi un mes máis frío do normal.
Outro dato que confirma que xuño se comportou por baixo das expectativas son as horas de insolación. En todas as estacións, salvo na de Pontevedra, reducíronse, incluso en Ourense. Isto débese ao predominio de ventos do oeste que xeraron moita humidade de tipo baixo, a que impide o paso da radiación solar.
O mes de xuño non só foi atípico en Galicia, senón tamén no resto de España. A Aemet recoñece que «se rexistrou unha temperatura media de 19,9 graos no conxunto da España peninsular. Queda 0,2 por baixo da media. Con estes datos, foi un mes con carácter frío, o primeiro na Península desde abril do 2022».
En canto ao tempo do presente, a previsión anuncia para hoxe unha xornada que podería acabar sendo a máis calorosa do verán nalgunhas zonas. O ascenso das máxima será xeneralizado, aínda que algo máis intenso na metade norte. Lugo podería chegar ata os 31 graos. Con todo, a calor acada este venres o seu pico porque mañá caerá de xeito moi brusco.
Este sábado, o vento soprará do norte. Nas provincias da Coruña e Lugo cubrirase o ceo e choverá pola mañá. Ademais, haberá un descenso térmico notable en toda a comunidade. Volvendo ao caso da capital lucense, en 24 horas, o termómetro descenderá ao redor dos 12 graos.
O domingo regresará o nordés. Por tanto, volverá imporse un contraste entre as provincias do norte e do sur. Nas provincias de Pontevedra e Ourense subirán as máxima, pero con valores moi afastados dos que agardan hoxe.
Para a semana que vén, os modelos seguen sostendo a súa aposta de que a circulación do oeste será protagonista. Agardan, por tanto, uns días con mais humidade nas provincias atlánticas e con temperaturas algo por baixo da media.
De momento, non hai noticias sobre cando Galicia podería volver recuperar a influencia anticiclónica.