Os protagonistas da mítica serie estarían a negociar para reunirse nun especial para HBOMax, que se porá en marcha en maio
07 feb 2020 . Actualizado á 13:53 h.As seis estrelas de Friends, unha das comedias máis populares da historia da televisión, están moi preto de acadar un acordo para reunirse nun especial para a plataforma dixital HBO Max, informou o medio especializado Deadline. Aínda que os millóns de fans de Friends suspiraron durante anos por novos capítulos da serie, esta reunión especial non sería un episodio de ficción como tal senón, máis ben, un programa estilo «retrospectiva» con entrevistas coa repartición, tal e como o describiu The Wall Street Journal.
The Hollywood Reporter adiantara en novembro que había un proxecto en marcha neste sentido, aínda que nese momento este portal sinalou que as negociacións se atopaban aínda dando os seus primeiros pasos. Este especial sería unha carta de presentación de luxo para HBO Max, o novo servizo de streaming de WarnerMedia e que terá os dereitos de emisión de Friends tras abandonar Netflix, segundo Efe.
Está previsto que HBO Max, unha nova proposta para o cada vez máis competido mundo do streaming, comece a súa andaina en maio deste ano. Deadline asegurou que cada un dos seis protagonistas de Friends recibiría entre 3 e 4 millóns de dólares por aparecer nese espazo, mentres que The Wall Street Journal situou a cifra entre os 2,25 e os 2,5 millóns por cabeza.
«Veñen grandes noticias...», escribiu o actor Matthew Perry en Twitter esta semana sen dar máis detalles.
Friends, que se estreou o 22 de setembro de 1994, pechou no 2004 dez tempadas de éxitos tras 236 episodios en antena protagonizados por Jennifer Aniston, Courtney Cox, Lisa Kudrow, Matt LeBlanc, Matthew Perry e David Schwimmer. Pero a comedia segue sendo un fenómeno para incontables afeccionados en todo o mundo que aínda están dispostos a ver, unha e outra vez en reposicións ou plataformas dixitais, as historias neoiorquinas de Rachel, Monica, Phoebe, Joey, Chandler e Ross.
A finais de 2018 estendeuse o rumor de que Friends ía saír do catálogo de Netflix, pero pouco despois a plataforma confirmou que seguiría na súa oferta polo menos durante 2019. The New York Times asegurou entón que Netflix pagou cen millóns de dólares a Warner para conservala durante este ano.