A agardada tempada final da serie estrearase en Netflix en tres entregas, con catro episodios o 27 de novembro, tres o 26 de decembro e o desenlace, o 1 de xaneiro do 2026
16 jul 2025 . Actualizado á 20:15 h.Á cuadrilla máis popular de Netflix queda por librar unha última e definitiva batalla contra o mal que quere apoderarse da vila de Hawkins. O próximo outono, os mozos protagonistas de Stranger Things intentarán de novo deter a Vecna, pero antes terán que atopalo.
Este mércores, a plataforma empezou a quentar motores para a despedida dunha das series máis agardadas do 2025 e publicou o primeiro tráiler da tempada quinta e última desta creación dos irmáns Duffer. A estrea producirase en tres entregas: catro episodios chegarán á plataforma o 27 de novembro, outros tres farano o 26 de decembro e o episodio final farase público o 1 de xaneiro do 2026.
A sinopse desta última entrega sitúa a acción no outono de 1987: «Hawkins segue marcada pola apertura dos portais, e os nosos protagonistas comparten un único obxectivo: atopar a Vecna e acabar con el. Pero desapareceu, ninguén sabe onde está nin cales son os seus plans. Para complicar aínda máis as cousas, o Goberno puxo a cidade en corentena militar e intensificou a procura de Once, que se ve obrigada a esconderse de novo. A medida que se achega o aniversario da desaparición de Will, tamén crece unha inquietude xa coñecida. A batalla final está a piques de empezar, e deberán enfrontarse a unha escuridade máis poderosa e letal que nunca. Para acabar con este pesadelo, deberán estar todos xuntos, unha última vez».
Para esta última función, a serie volveu a reunir a súa repartición principal, que inclúe a Winona Ryder (Joyce Byers), David Harbour (Jim Hopper), Millie Bobby Brown (Once), Finn Wolfhard (Mike Wheeler), Gaten Matarazzo (Dustin Henderson), Caleb McLaughlin (Lucas Sinclair), Noah Schnapp (Will Byers), Sadie Sink (Max Mayfield), Natalia Dyer (Nancy Wheeler) e Charlie Heaton (Jonathan Byers), entre outros.