O restaurante Onde Keiras de Bertamiráns logrou tamén en Avilés o primeiro premio de Galicia
17 dic 2025 . Actualizado á 05:00 h.Ten aspecto de Ferrero Rocher —redondo, sobre unha cápsula de papel e cuberto con améndoa picada—, pero o bombón do restaurante Onde Keiras, o seu Keirón (como o bautizaron), é salgado. Leva foie e unha xelatina de vermú no seu corazón. Con esta elaboración alzouse o establecemento de Bertamiráns co primeiro premio ao Mellor Aperitivo de Galicia e o terceiro a nivel español nunha final celebrada o pasado mércores en Avilés.
Alí, precisamente, é onde se coñeceron Manuel Rey e Vanessa Amor, o matrimonio que abriu en maio do 2024 este local próximo ao Paseo do Rego do Ameneiral. Explican que se decataron do concurso a través das redes sociais e confirmaron cun dos seus provedores, patrocinador do certame gastronómico (Picofino, marca de vermú asturiano que incluíron na receita), que se trataba dunha convocatoria real.
Máis dun centenar de negocios hostaleiros de toda España presentáronse e só 16 deles pasaron o primeiro cribado, entre eles o Onde Keiras: «Do 15 ao 30 de novembro estivemos a servir o aperitivo e os nosos clientes foron o primeiro crítico. Tiñamos uns cartóns cun código QR que dabamos con cada un deles e a xente tiña que votar con ese código individual e enviar unha foto, para evitar votos falsos. Participaron tabernas, bares, cafeterías e restaurantes de moitas partes e, para nós era case impensable, estando en Bertamiráns, chegar ao nivel de locais de Madrid ou outras grandes cidades, pola capacidade de captación de votantes que teñen alí... ». Con todo, quedaron en primeiro lugar a nivel rexional, quintos na categoría de aperitivo moderno e novenos no ránking xeral (onde concursaban tanto as tapas de cociña tradicional como contemporánea). Iso abriulle as portas a unha final na que competiron 14 aperitivos (2 dos 16 elixidos non puideron asistir). O gañador foron as patacas bravas de Cal Carneiro (Valencia), vencedores na categoría tradicional, seguidos pola elaboración moderna de Alalunga Taberna (Asturias).
Manuel —artífice da receita amiense— e Vanessa —catadora oficial na fase de creación— defenderon nas cociñas do hotel Palacio Avilés o seu bombón salgado e ese mesmo día pola tarde entregábanlle o seu ouro galego e bronce nacional ao Keirón. «Non nolo agardabamos, a verdade. Fomos a Avilés coa idea de ver a cidade onde nos coñecemos, porque eu son asturiana, e aos amigos que temos aquí... xa nos dabamos satisfeitos con iso, pero volvemos con dous premios», lembra Vanessa. «Foi unha sorpresa enorme, pero é un orgullo poder dicir que aquí facemos un dos mellores aperitivos de España», engade Manuel, quen aclara que xa fixeron o Keirón con vistas a engadilo á súa carta. «O Keirón viño para quedarse. Pensamos nun formato saboroso e práctico, para poder traballar con el durante os nosos servizos», di o propietario do Onde Keiras. Alí ofréceno en formato individual por 2,5 euros. Ademais, crearon unhas caixiñas para levar de 5 unidades por 11 euros e de 12 por 25 euros.
O matrimonio celebrou o éxito ao día seguinte co seu equipo, porque «grazas a Begoña, Lourdes e Ana chegamos onde estamos. Ademais, involucráronse moitísimo no concurso e, aínda que non puideron vir a Avilés connosco, fíxolles moita ilusión», destacan nun local que gañou popularidade cos cachopos que xa facían antes no Kratos de Brión e coas elaboracións fóra de carta nas que introducen o produto de tempada (nesta época, por exemplo, sorprenden desde cun jarrete de cervo estofado ou xabaril con cogomelos ata cuns torreznos de aguacate ou un bacoriño lechal asado). Abren de xoves a luns, de 12.00 a 24.00 horas (aínda que este Nadal modificarán os horarios e pecharán algún luns para traballar os días 24, 30 e 31).