O Obradoiro, 500 partidos na elite

A historia do Obradoiro na máxima categoría do baloncesto español arrincou o 25 de abril de 1982, en Mataró. Aquel día, os composteláns impuxéronse por 86-89 nunha final de máxima esixencia e lograron o ascenso. Ao seu regreso, o equipo foi recibido no aeroporto internacional de Lavacolla por unha multitude de afeccionados. Aquel conxunto, dirixido por Pepe Casal e Julio Bernárdez, conseguira o milagre, levar ao Obradoiro a Primeira División.

A estrea na elite foi meses despois, na tempada 1982-1983, a última do antigo formato de Primeira antes do nacemento da ACB. O Obra debutou na máxima división o 10 de outubro de 1982 na cancha do Real Madrid, onde perdeu por 100-63. Sete días despois chegou o debú en Sar fronte ao Caixa de Rolda. Os santiagueses lograron a vitoria por 79-75, a primeira das dúas que conseguirían durante aquela campaña. O equipo non puido manterse na categoría nun curso no que todo lle saíu ao revés.

Despois de estar ao bordo da desaparición e de loitar contra varias decisións xudiciais, o colectivo da capital galega regresou á elite do baloncesto na tempada 2009-2010. Con todo, con só oito vitorias, volveu descender. A estancia na LEB Oro durou apenas un ano. Na campaña 2011-2012, con Moncho Fernández no banco, o Obradoiro volveu tocar o ceo nun playoff perfecto, moi longo e intenso.

Ler máis: Pepe Casal: «A lesión de Chuck Verderber marcou un antes e un despois para o Obradoiro na súa estrea na Primeira División»

O cadro santiagués permaneceu trece tempadas consecutivas na ACB. Na 2023-2024, con 11 vitorias, perdeu de novo a categoría. Tras dous exercicios no Primeira FEB, o Obra regresou para medir as súas forzas cos grandes do deporte da canastra.

Seis xornadas consumidas

Con seis xornadas disputadas, o balance é de tres vitorias e tres derrotas, despois de caer esta fin de semana no derbi de Sar fronte ao Breogán. O vindeiro sábado, en Manresa (18.00 horas), o Obradoiro acadará os 500 partidos na elite. Leva na súa mochila 26 na Primeira División e 473 na ACB.

Un total de seis equipos galegos militaron ata a data na máxima división. O que máis partidos xogou e máis tempadas disputou na altura é o Breogán, con 970 encontros. Séguelle o Obradoiro, con 499. Despois están Ferrol e Ourense, con 428 e 383, respectivamente. Completan a lista o Básquet Coruña e o Bosco.

---

---

---