O Victoria FC, 10 anos e 300 partidos
O club compostelán, fundado en 1937, conta para o curso 2025-2026 con 509 licenzas federativas, das cales 123 son do fútbol feminino
04 nov 2025 . Actualizado á 20:48 h.O Victoria Fútbol Club, fundado en 1937, conta para a tempada 2025-2026 cun total de 509 licenzas federativas, das cales 123 son para o fútbol feminino. No deporte rei masculino a entidade suma 331 fichas, ademais de 27 en modestos e 28 en veteranos. A entidade compostelá que preside José Manuel García Santiso (Santiago, 1956) ten na súa estrutura un total de 39 equipos (7 femininos e 32 masculinos), dispón dos servizos de 46 adestradores e conta cun presuposto entre os 250 e os 300 mil euros. Francisco Javier García Rouco, Chivi (Santiago, 1980), é o coordinador de todo este grande armazón deportivo.
A sección feminina do Victoria FC creouse na tempada 2015-2016 baixo a dirección de Chivi García. Fíxoo con dous equipos, un sénior e outro infantil. No seu primeiro ano, o conxunto sénior proclamouse campión da Segunda División galega e logrou o ascenso. No curso 16-17, o club xa contaba con dous equipos en categoría sénior. O A proclamouse campión da Primeira galega e ascendeu á Primeira Nacional, ademais de gañar a Copa Galega. O B tamén conseguiu cambiar de categoría tras quedar no segundo lugar.
Durante os seguintes anos, a sección feminina do Victoria FC, que ten detrás o respaldo patrocinador de Cobre San Rafael para o primeiro equipo, ampliou a súa canteira e acumulou máis títulos, como a Copa do Sar feminina e a Copa Gallaecia alevín, na 17-18. Grazas a este crecemento, a entidade da capital galega converteuse no club con máis licenzas femininas da comarca de Santiago. Neste momento presenta equipos en todas as categorías. Os éxitos deportivos e o traballo na base «reflicte o compromiso da organización coa igualdade e a educación» das súas xogadoras, sinalan desde o club.
Diversos actos de aniversario
Este ano, o club celebra o décimo aniversario da súa sección feminina. Fíxoo inicialmente cunha gala de presentación da tempada baixo o lema «10 anos de Victoria FC, paixón, igualdade e fútbol». Ademais desta gala, entre as súas actividades están o recoñecemento a xogadoras, adestradores e familias que apoiaron nesta década, diferentes saques de honra nos partidos de ilustres rojillas, recoñecemento a referentes femininos da cidade e a súa comarca, visitas a colexios, hospitais e residencias de maiores, ademais dunhas xornadas tituladas «Claves para unha boa saúde mental e física», que serán abertas para todo o mundo. Publicarase un libro con imaxes dos 10 anos.
Chivi García foi quen puxo en marcha a sección feminina. Foi o adestrador ata hai ano e medio, posto que na actualidade ocupa Tomás Mougán (Santiago, 1980). Chivi tivo que deixar o banco por un problema de saúde e agora é quen move todos os fíos deportivos dun club que en pouco máis dunha década converterase en centenario.
«O traballo na base reflicte o compromiso da organización coa igualdade e a educación das xogadoras» Chivi García, coordinador do Victoria FC
O domingo, o Victoria FC feminino da Terceira Federación acadou os 300 partidos en competición oficial, nos seus dez anos de existencia. As rojillas celebrárono cunha goleada en Santa Isabel contra o Sárdoma (4-0).
Moitas alegrías
Sobre o fútbol feminino do club, Chivi revela que conta «cunha estrutura moi sólida desde hai anos. Traballamos a base e buscamos xogadoras en toda a comarca de Santiago para formalas e facelas crecer, tanto persoal como deportivamente. Somos un club de canteira, coa intención, entre outros obxectivos, de conseguir que as nosas futbolistas poidan chegar á cima, como vén pasando nas últimas campañas. Lúa Arufe asinou co Barcelona o pasado verán e xa xogou varios partidos na máxima categoría. Tamén recordo a Noa, que se foi ao Celta, ou a Laurita, contratada polo Deportivo. O Victoria FC é un club de formación». O traballo na sección feminina que se vén realizando na histórica entidade compostelá reporta ao mesmo tempo satisfaccións persoais e bos marcadores, pois en todas as categorías os bos resultados sucédense ano tras ano. «Dannos moitas alegrías», recoñece Chivi.
«Facemos un fútbol que lle gusta á xente»
«Na maioría dos clubs, a sección masculina é a que destaca. Con todo, no Victoria FC é o apartado feminino o que lle dá unha maior transcendencia ao nome da entidade. É o equipo que máis viaxou fóra de Galicia», subliña Chivi.
O coordinador apunta que un dos obxectivos principais é que «o fútbol que practicamos gústelle á xente. Na sección feminina todos os equipos xogan igual e marcamos a filosofía desde as categorías máis pequenas. Temos a mesma metodoloxía para todas as mozas, un sistema que marca a dirección deportiva. Iso estanos funcionando moi ben».