O Obradoiro reacciona no tramo final para seguir vivo na Copa España (76-82)

O Obradoiro conseguiu clasificarse para a seguinte rolda da Copa España de baloncesto. Fíxoo con moito sufrimento, despois de deixar escapar unha renda de 13 puntos. Ao final, cando peor se lle puxeron as cousas, co Oviedo sumando unha vantaxe de seis, os de Epi lograron recuperar a confianza e déronlle a volta ao marcador cun parcial de 0-10. O equipo da capital galega logrou o pase por 76-82. Catro xogadores sumaron 60 destes 82 puntos: Quintela (17), Barcello (16), Dos Anjos (15) e Barrueta (12).

O Obradoiro arrincou o partido pisando o acelerador a lume de biqueira, cun grande acerto no lanzamento exterior, onde Barcello e Barrueta foron grandes protagonistas. O partido iniciouse cunha canastra do Oviedo, pero rapidamente o Obra púxose por diante no luminoso, con cinco puntos de Álex Barcello. Barrueta, con outro triplo, aumentou a vantaxe a catro, pero igualou o marcador (8-8) Townes cun 3+1.

Respondeu Barcello cun novo disparo desde longa distancia. Foi un pesadelo para os ovetenses. Aos poucos, o equipo que prepara Epi foi cobrando vantaxe no marcador. Un triplo de Barrueta empezou a marcar a clara diferenza do colectivo da capital galega. ?Cun parcial de 0-10, o Obra foise no marcador e traduciu o seu dominio nun máis 13 (15-28), con anotacións de Quintela, Alonso, Etxeguren e tres tiros libres consecutivos de Andersson, que converteu tras unha falta cando intentaba un triplo.

O gran refacho do equipo, cun altísimo ritmo e acerto ofensivo, empezou a apagarse no transcurso final do primeiro acto. O Oviedo reaccionou e cun triplo de Hermanson sobre a bucina pechou o primeiro acto cun axustado 27-32. O Oviedo finalizou o cuarto inicial cun parcial de 12-4. ?Barcello, con 11 puntos, foi o principal protagonista visitante. No conxunto local, Nwaokorie, con oito, e Townes, con sete, foron os que mantiveron con vida ao quinteto asturiano.

Os triplos de Hermanson

O segundo cuarto púxose marcha cun pletórico Hermanson. ?El só puxo contra as cordas ao Obradoiro, con catro de cinco triplos, ademais de dous tiros libres. Hermanson estableceu un igualado 39-40. O Obra sufriu máis da conta e viviu os seus peores momentos do encontro.

Os galegos recuperaron a confianza e o alento cos acertos de Quintela, Dos Anjos e Andersson. Pasou do máis 1 ao máis 11 (42-53), cun triplo de Barrueta, dúas canastras de Quintela e Dos Anjos e dous tiros libres de Andersson. Apagouse Hermanson no Oviedo e o cadro local sufriu moito máis, chegándose ao descanso do encontro cun marcador favorable aos galegos de 42-53. Neste segundo cuarto, no que o Obra tivo escaseza de triplos, debutou o pivote Deixan Kravic.

Nada máis regresar de vestiarios, Quintela mantivo a renda de 13, pero aos poucos o Obra empezou a perder enerxía. Townes, con dous triplos, botouse o equipo ás súas costas e obrigou a Epi a solicitar un tempo morto cando a diferenza quedou en sete (50-57). Na terceira entrega, o Obra só anotou 10 puntos, chegándose ao último cuarto cun apertado 62-63.

Coa auga ao pescozo

O quinteto galego viuse coa auga ao pescozo nada máis arrincar a parte decisiva do duelo. Jorge Arias anotou un triplo e situou ao Oviedo por diante no luminoso: 65-63. O Obradoiro tocou fondo e empezou a sufrir máis da conta. En nove minutos desapareceu da pista e o Oviedo púxolle o encontro moi costa arriba cun parcial de 15-0, no tramo final do terceiro cuarto e na parte inicial do último cuarto.

Dos Anjos chegou para pór unha pequena tirita na ferida do equipo santiagués, que estivo oito abaixo (71-63). Repetiu Dos Anjos para situar o marcador nun apertado (71-67). Acto seguido, Sergi Quintela empezou a ver a luz do final do túnel. Converteu un triplo e colocou o electrónico nun esperanzador 71-70. Foi entón cando o Oviedo quedou sen gasolina.

A reacción final

Hermanson desapareceu e o equipo de Epi, desde o tiro libre, asinou un parcial de 0-10. Os galegos puxeron aos asturianos contra as cordas e volveron recuperar unha renda de seis, cunha nova canastra de Quintela. Xa foi unha vantaxe que conservaron ata o final. O Obra segue adiante na Copa España grazas ao definitivo 76-82, aínda que ao descanso parecía que ía ser unha viaxe máis cómoda e con menos fochancas.

---

---

---