Unha exposición de Gabriel Tizón, charlas, rutas, música e xogos forman parte das propostas
03 sep 2025 . Actualizado á 04:55 h.Historia, identidade e orgullo de barrio. Todo iso está presente na nova edición da Semana Cultural de Conxo, que celebrará a súa 38.ª edición desde este venres ata o día 12. Haberá exposicións, mesas redondas, rutas e actividades musicais, incluíndo entre estas últimas a primeira edición de «Novas Xeras», unha iniciativa que pretende dar un espazo ás novas xeracións musicais emerxentes relacionadas con Conxo.
A Semana Cultural comezará coa inauguración da exposición «Ou imaxinario dun barrio», con imaxes tomadas polo fotógrafo Gabriel Tizón durante os últimos anos para retratar o barrio de Conxo en actividades que mostran o seu imaxinario e a unión dos veciños. Despois, celebrarase unha mesa redonda baixo o título «Conxo, 100 anos de identidade», na que participarán José Luciano Villar, Mercedes Franqueira e Carme García. O primeiro día finalizará coa estrea de «Novas Xeras», que terá como mestre de cerimonias a Vituco Neira, de Ruxe Ruxe. Tamén se subirán ao escenario o músico arxentino Naxo Ganin, o grupo Mirando Flores e Rafael Briceño.
O sábado 6, pola mañá haberá un taller de cociña intercultural, mentres que pola noite (21 horas) celebrarase o concerto de De Ningures no marco do centenario da adhesión de Conxo ao Concello de Santiago.
As actividades renovaranse o día 8 cun torneo de tenis de mesa e a actuación «Meninos do pandeiro», un proxecto de Xan Pérez e Carlos Quintá vinculado a aCentral Folque. O martes 9 desenvolveranse xogos na rúa baixo o lema «Viaxamos a 1925» (18.30 horas), e, posteriormente, unha mostra de traballos audiovisuais académicos (20 horas).
O mércores 10, de 17.30 a 20 horas, haberá unha ruta ciclista polo Bosque de Conxo da man do Club Ciclista Compostelán. O xoves 11 a actividade intensifícase. Ás 9.30 horas terá lugar unha ruta de sendeirismo polas parroquias do sueste do antigo Concello de Conxo, que pasará sor San Cristo do Eixo, Aríns e Marrozos. Para participar é necesario anotarse. Pola tarde, haberá un taller de imprenta tipográfica, xogos de estratexia e a actuación de Teatro do Muíño, de Laraño. O peche a esta edición será o día 12 con xogos tradicionais e o espectáculo de animación á lectura.