O BNG de Ordes propón revisar a ordenanza dos vaos e unha moratoria para a súa solicitude
SANTIAGO
O alcalde sinala que se acomete unha regularización como a feita no seu día co lixo, a auga ou o IBI
29 jun 2025 . Actualizado á 05:00 h.O BNG de Ordes expuxo unha proposta para revisar a ordenanza dos vaos, tras o envío por parte do Concello de comunicacións nas que se advirte a veciños e comunidades de propietarios de que no prazo dun mes desde a súa recepción deben solicitar autorización para o vao; a súa inexistencia, indica o escrito, pode dar lugar a sancións policiais.
O nacionalista Pablo Vidal cre que antes de enviar eses escritos que ve ameazantes, deberíase manter un debate sobre a revisión da ordenanza. Algo que instan o alcalde a facer, vendo as distintas casuísticas e establecendo taxas ou excepcións oportunas. Piden unha moratoria nese prazo dun mes ata a revisión.
O rexedor José Luis Martínez Sanjurjo, pola súa banda, sinala que é unha regularización como se fixo no seu día co lixo, a auga ou o IBI. Xustifica as comunicacións para que cada veciño consulte o seu caso coa Policía Local e efectuar a alta do vao se procede; e considera que algunha modificación que pide o BNG non é legal.