Fíxoo co «compromiso por fortalecer a comunicación e estreitar o vínculo coa afección»
18 jun 2025 . Actualizado á 17:11 h.O Obradoiro, «no seu compromiso constante por fortalecer a comunicación e estreitar o vínculo coa súa afección», deu un paso máis na súa evolución dixital co lanzamento da súa nova páxina web oficial. Esta renovación ten como obxectivo «ofrecer unha plataforma máis clara, intuitiva e accesible para todos os seguidores do club», facilitando o acceso á información e mellorando a experiencia de navegación.
O Obra aposta por unha modernización integral da súa presenza en liña mediante a nova plataforma. Este cambio permitirá centralizar nun único sistema todas as ferramentas dixitais do club, integrando contidos de actualidade, a área de abonados, a venda de entradas e merchandising oficial.
Entre as principais novidades, a web incorpora un espazo de noticias e galerías fotográficas, unha sección dedicada á historia do club, canles de contacto e un apartado específico para o proxecto obra-social, que recollerá as iniciativas sociais levadas a cabo durante a pasada tempada. Ademais, destacarase o labor do Club de Empresas e a presenza dos principais patrocinadores.
No plano deportivo, os afeccionados atoparán toda a información sobre o primeiro equipo, así como un espazo para a canteira, que incluirá detalles sobre os campus e os equipos da Fundación Obradoiro. Un dos elementos distintivos desta nova web é a adopción do dominio .gal.