O Supremo anula a sanción que o Poder Xudicial impuxo ao xuíz Taín por ter o 50% dunha produtora de televisión

A sección sexta da sala do Contencioso-Administrativo do Tribunal Supremo (TS) deu a razón ao xuíz galego José Antonio Vázquez Taín, instrutor de importantes casos de narcotráfico en Vilagarcía de Arousa e do roubo do Códice Calixtino e o asasinato da nena Asunta en Santiago, no seu recurso contra a sanción que lle impuxo o Consello Xeral do Poder Xudicial (CGPJ) por considerar que incorrera en incompatibilidade co seu cargo de maxistrado ao posuír o 50% das participacións sociais da produtora de cine e televisión Amarola Producións SL.

A sanción que impuxo a comisión disciplinaria do CGPJ a Vázquez Taín foi confirmada polo pleno do consello o 29 de febreiro do 2024 e era por unha falta moi grave do artigo 417.8 da Lei Orgánica do Poder Xudicial, que considera incompatible co cargo de xuíz ou maxistrado o exercicio de toda actividade mercantil «por si ou por outro», explica o TS. A sanción foi de dez días de suspensión de funcións.

A sentenza do alto tribunal considera que non se acreditou «nin sequera de xeito indiciario, pero suficientemente xustificada e razoada, que máis aló da titularidade do 50 por cento das participacións sociais da sociedade de responsabilidade limitada por parte do actor, o mesmo desempeñase de xeito real e efectivo o exercicio da actividade mercantil: nin ostentaba a administración da sociedade, nin subscribía os contratos da sociedade con terceiros, nin se achegaron argumentos sólidos que puxesen de manifesto unha administración de feito da sociedade» por parte de Vázquez Taín.

A resolución do Supremo estima os argumentos que xa deu o maxistrado, que agora é titular dun xulgado do Penal na Coruña, cando coñeceu a sanción e engade que «nin o obxecto social da mercantil da cal resultaba titular de participacións sociais o actor, nin a índole das actividades levadas a cabo pola mesma puxeron de manifesto que se trate de circunstancias reveladoras dunha eventual afectación á función xurisdiccional levada a cabo polo maxistrado, nin no que poida afectar á súa independencia, nin tampouco ao seu estrito desempeño, conclusión que avala o propio órgano gobernativo, ao sinalar na actuación administrativa, a nula incidencia da infracción na actividade xudicial».

Vázquez Taín mostrouse satisfeito coa sentenza do Supremo. «Eu xamais ocultei nada, fixen todo con transparencia e na convicción de que, como se demostrou, non estaba a facer nada contrario á lei, como outros compañeiros que escriben libros ou dan clases», sinala. «O que quedou claro é que, ao contrario do que dixo o CGPJ eu nin asinei os contratos nin ninguén me advertiu de que consideraban que estaba a incorrer nunha incompatibilidade, sancionáronme directamente», engade.

O maxistrado, que considera moi importante esta sentenza «porque é doutrina e vén aclarar un pouco que podemos facer e que non os xuíces», asegura que xa cumpriu a sanción de dez días de suspensión de funcións, pero que non pensa reclamar.

---

---

---