Temos ante nos un importante reto, que é poñer vivendas de calidade no mercado a prezos asequibles. A Xunta aposta decididamente nas súas políticas pola vivenda protexida, pero para acadar os resultados que buscamos é necesario contar coa colaboración de todos os implicados neste sector, dende as distintas administracións aos promotores, cooperativas, construtores, técnicos e, incluso, os futuros usuarios.
O Observatorio da Vivenda de Galicia é o lugar de encontro de todos eles. A política de vivenda da Xunta está plasmada no Pacto de Vivenda de Galicia 2021-2025, aprobado por unanimidade no seo do Observatorio, e xa se está a traballar no novo Pacto para o período 2026-2031.
Esta liña de traballo da Xunta na que estamos inmersos permitiranos, a finais deste ano ou comezos do próximo, entregar aos seus beneficiarios as primeiras vivendas construídas no marco do compromiso de duplicar o parque público na presente lexislatura. Mentres, as necesidades máis inmediatas atendémolas con axudas para alugueiro e adquisición de vivenda e mobilización de vivendas baleiras. Cada ano son varios miles de familias en toda Galicia as que se benefician das mesmas.
Pero tamén é preciso pensar no futuro a medio prazo, polo que a Xunta está a traballar no desenvolvemento de solo urbanizado para a construción de 25.000 vivendas, das que 20.000 serán protexidas, nas sete grandes cidades e as súas áreas de influencia e agardamos que eses desenvolvementos estimulen aos promotores privados a construír vivenda protexida.
En Santiago xa foi licitado, e ten proposta de adxudicación, o contrato para a redacción do proxecto de interese autonómico para o desenvolvemento do SUD 1, en Mallou, con capacidade para a construción de aproximadamente 3.460 vivendas, maioritariamente protexida.
Tamén en Santiago estamos a construír vivenda pública en todas as parcelas propiedade do IGVS e agardamos a cesión doutras por parte do concello. Tamén traballamos en municipios do entorno, como Teo, no que está próxima a licitación de proxectos; e Ames, nos que estamos a pechar co concello a cesión de solo para vivenda pública.
Por último, poñemos medidas para estimular o sector axilizando trámites, desburocratizando ou con axudas a promotores. En definitiva, actuar como catalizador de, por un lado, un aumento da oferta polas novas construcións públicas e, polo outro, o impulso da edificación privada. Só así, con máis vivendas dispoñibles, baixarán os prezos. Non somos partidarios de regular e prohibir.
Heriberto García Porto é ou secretario xeral de Vivenda e Urbanismo dá Xunta