Reumatoloxía e Pediatría do CHUS, elixidos como os mellores servizos de España

O CHUS continúa sumando galardóns. Os últimos recibiunos esta mañá, na entrega de Premios Best in Class 2024, que a publicación Gaceta Médica outorga para destacar o desempeño da rede española pública de hospitais e centros de saúde. No caso compostelán, os dous servizos condecorados foron os de Pediatría e Reumatoloxía, elixidos como os mellores de todo o sistema nacional de saúde durante o 2024. No acto estivo o conselleiro de Sanidade, Antonio Gómez Caamaño, que destacou que os premios «acreditan a calidade asistencial e a capacitación dos profesionais», afirmando ademais que Galicia conta cunha sanidade punteira e con ningúns dos mellores servizos dentro do sistema sanitario nacional.

Xunto aos dous equipos premiados do CHUS destacouse aos de Dermatoloxía e Patoloxía Dixestiva do Complexo Universitario Hospitalario de Pontevedra. A maiores, Galicia tamén foi recoñecida con tres diplomas acreditativos pola súa excelencia 5 estrelas. No caso compostelán, recaeu sobre o servizo de Cardioloxía. Houbo outro diploma para a Unidade de Dor do Complexo Hospitalario Universitario da Coruña, e un último para o centro de saúde da Estrada, como o mellor centro de primeiro nivel asistencial.

No referente á área sanitaria de Santiago, o Hospital Clínico chegou á final como centro de Alta Complexidade. Tamén o fixeron os servizos de Enfermidades Infecciosas, Farmacia Hospitalaria, Farmacia Hospitalaria en Oncoloxía, Microbioloxía, Oncoloxía e Patoloxía Dixestiva. «Temos unha sanidade punteira e estamos nas mellores mans», pechou Gómez Caamaño, acompañado da directora de Saúde Pública, Carmen Durán; e do director xeral de Asistencia Sanitaria, Alfredo Silva.

---

---

---