Art for Dent pecha con pena, pero agradecida, a recollida solidaria de tapóns

Con moita gratitude, pero tamén con pena, a Asociación Art for Dent, formada por varias familias de Galicia e Asturias para loitar contra esta enfermidade que afecta os riles, anunciou días atrás que deixa de recoller tapóns para recadar fondos para a investigación da doenza no NefroCHUS. A campaña de recollida prolongouse durante cinco anos, un tempo de «esforzo, solidariedade e traballo conxunto», sinalan desde a entidade que deixa de recoller os tapóns polas dificultades de loxística que hai detrás da recollida e do envío á planta recicladora.

A campaña comezou en xaneiro de 2020 e, cinco anos despois, a asociación logrou reciclar máis de 125 toneladas de tapóns, o que traduce en máis de 25.000 euros para a investigación da enfermidade no centro NefroCHUS do Hospital Clínico de Santiago.

«Cada tapón, cada xesto de apoio, tivo un impacto real», aseguran desde a entidade, que engade que «grazas a todos demos visibilidade a unha enfermidade rara que necesitaba ser coñecida e xuntos conseguimos que a investigación se puxese en marcha» e para a que seguirá recadando fondos a través doutras actividades.

«Grazas aos que estivestes día a día, durante estes cinco anos porque sen vós fose imposible continuar», conclúe a asociación sen ánimo de lucro. Hai cinco anos, a recollida solidaria de tapóns centralizouse no campo de fútbol da Escravitude, en Padrón, club ao que pertencía o neno de Brión Hugo Yáñez e cuxa familia encabezou entón a campaña.

As dificultades para recoller os tapóns en distintos puntos da comunidade, o seu almacenamento, a súa preparación ou o posterior traslado nun transporte gratuíto á planta recicladora complican que a asociación poida seguir con esta tarefa, polo que optou, non sen pena, por centrarse noutro tipo de iniciativas solidarias para seguir recadando fondos para a investigación da enfermidade.

---

---

---