O Sergas aposta por adaptar as revisións oncolóxicas á agresividade e recorrencia dos diferentes tumores
SANTIAGO
O conselleiro de Sanidade, Antonio Gómez Caamaño, apuntou a un novo protocolo baseado en criterios científicos e non económicos
29 may 2024 . Actualizado á 05:00 h.O conselleiro de Sanidade, Antonio Gómez Caamaño, volveu abordar onte os problemas que veñen minguando a actividade no servizo de Oncoloxía do Complexo Hospitalario Universitario de Santiago (CHUS). Fíxoo para admitir dúas cuestións nas que cre que se debe traballar: o atraso nas revisións das pacientes oncolóxicas, e as esperas eternas no hospital de día. No primeiro caso, debullou que a súa proposta pasa por deseñar un novo protocolo que adapte o número de consultas, unha vez superada a enfermidade, á agresividade dos diferentes tumores.
«Non é un cambio por criterios económicos, senón polo medicamento baseado na ciencia. E tampouco é algo que deba aplicarse en Santiago, senón en toda Galicia», apuntou Gómez Caamaño, quen afirmou que «por poñer un exemplo, nun cancro de mama non todas as pacientes teñen o mesmo tumor, non todos contan coa mesma agresividade ou co mesmo grao de recorrencia. Temos que adaptar o número de consultas a ese risco. Se a dez anos teñen un risco do 5%, non é o mesmo que se noutro caso, o risco a cinco anos é do 30%». O novo responsable do Sergas admitiu que iso requirirá «moita base científica para facer unha valoración para cada paciente», o que seguramente deba estar acompañado de maiores recursos humanos.
Hospital de día
Cuestionado polas queixas da Asociación de Pacientes do CHUS con relación ao hospital de día oncolóxico do Clínico, nas que afirmaron que hai xente que ten que esperar durante horas en estancias que non están habilitadas de xeito acorde, Gómez Caamaño admitiu que o problema existe e que será unha cuestión que «terá que abordar a nova xerencia». Considera que, neste caso, a solución non afecta exclusivamente o servizo de Oncoloxía, senón que se pode mellorar coa axuda doutros servizos, como o de análises clínicas, que poden dar maior prioridade ás persoas que están a esperar para tratamento.
«Hai que xestionar o hospital para que non se provoque tanta saturación, sempre vai habela en momentos puntuais, pero non pode ser de xeito sistemático», admitiu o conselleiro, que apuntou que a solución pasa por «algún cambio na xestión, que pode implicar máis recursos, pero podemos liquidalo».