O hostaleiro resalta a importancia que ten o Camiño de Santiago, que considera «fundamental» para o sector
12 jun 2021 . Actualizado á 00:58 h.O fundador e presidente de AC Hotels, Antonio Catalán, dá por completada a XXXI edición da Ruta Xacobea de AC Hotels by Marriot rodeado de empresarios e amigos. Unha tradición que cumpre anualmente, e que tivo como orixe unha promesa do empresario hai anos.
Antonio chegaba na súa bici á Praza do Obradoiro recalcando a importancia que ten o Camiño de Santiago, que considera «fundamental para o turismo». De feito, sinalou o valor que terá para o sector a prolongación do Xacobeo ata o 2022.
Despois dun período de perdas millonarias para o turismo, Catalán confía en que a evolución positiva da pandemia e a crecente campaña de vacinación «animarán» o último cuadrimestre do ano. «Os hoteis en xullo e agosto empezan a estar bastante ben. Nós xa temos abertos oitenta hoteis, e débennos faltar como vinte para abrir».
Aínda así, o empresario tamén expresou unha postura crítica coa política española, á que reprochou que en «un momento como este o importante é a sanidade e non a política», defendendo que as decisións con respecto á pandemia deben levar a cabo baixo criterios técnicos, e non políticos. Por iso, considera «un desastre» a estratexia de reapertura do Gobierno e as autonomías, e lamenta «que cada un vaia polo seu lado».
Tamén recalcou o seu apoio ao pasaporte covid da Unión Europea, xa que «poder mostrar a través do teu teléfono móbil» que estás inmunizado «axilizará» e «facilitará» a chegada de turistas ao noso país.
Para o empresario, esta edición da ruta que leva percorrendo tantos anos tivo unha gran carga simbólica, e dedicoulla aos seres queridos que perdeu durante este último ano. Entre eles, o seu fillo maior, que falecía o pasado mes de novembro despois de estar a loitar contra unha dura enfermidade.