O bus o urbano desconcerta aos turistas

s. Gómez / N. rodeiro / M. G. SANTIAGO / LA VOZ

SANTIAGO

C. VILLAVERDE

A deficiente sinalización e a falta de indicadores nos vehículos provoca que os visitantes non saiban onde deben apearse e impídelles determinar que dirección leva a liña

04 sep 2017 . Actualizado ás 05:00 h.

Os turistas que chegan a Santiago atopan no uso do transporte público unha tarefa complicada, que atribúen á falta de indicacións e información a bordo. Algúns suxiren que a instalación de pantallas electrónicas no interior dos autobuses facilitaríalles a experiencia.

Durante o verán, os buses urbanos deixan de ser patrimonio case exclusivo dos residentes na cidade, moito máis que familiarizados coas rutas e horarios das liñas. A imaxe de visitantes preguntando desesperados como se chega a praza de Galicia é moi común. É frecuente ver a peregrinos e turistas, mapa ou teléfono en man, deambular pola rúa da Senra en busca dunha liña que lles leve ao seu destino.

Unha vez no transporte urbano, os viaxeiros móstranse confundidos ao comprobar que non existe unha forma de saber onde teñen que baixar. As paradas non levan nomes, senón números -no mellor dos casos-, e o vehículo non lles advirte de cal será a seguinte. Así que recorren ao condutor do autobús.

Juan Fernández é chofer na liña C4. Recoñece que «os turistas van perdidos. Preguntan á xente como se vai á Catedral e dinlle que paren na Alameda, pero en canto chegan a Galeras xa se baixan». Aínda que algúns dos vehículos contan con paneis electrónicos, estes non funcionan. Nas liñas máis vellas aínda quedan algunhas pantallas de televisión, no seu día usadas para pasar publicidade.

Unha das excepcións a este desconcerto é a estación de autobuses, facilmente recoñecible polo cartel que figura na fachada. Con todo, a solución non é tan sinxela para os visitantes que acaban de chegar a Compostela e desexan coller o bus. Os turistas quéixanse de que no portelo de información de Tussa non lles conseguen resolver dúbidas como en que dirección deben tomar o autobús. Un claro exemplo desta confusión é a liña 5, que conta con dúas paradas na estación: unha para aqueles que se dirixen a Vite e outra que circula en sentido A Rocha. Ademais, os turistas consultado afirman que non se lles informou da existencia dunha aplicación móbil para a rede de transporte urbano.

«Non sabía que existía unha aplicación»

Yukiko Sakata atópase por primeira vez de visita na cidade e afirma que «non sabía que existía unha aplicación. Preguntei dentro da estación de buses por información e non me dixeron nada sobre ela». Ademais, a turista atópase confusa sobre como chegar ata o centro de Santiago, e di que só sabe que ten que «tomar a liña amarela e o número 5, pero agora indica que non ten servizo».

«Os autocares deberían indicar o seu percorrido»

Patricia Folgueira, metade galega e metade suíza, atópase de visita na cidade. A moza sinala que o transporte está «mal» respecto doutras cidades, xa que «os buses deberían indicar as paradas no seu interior antes de chegar a elas, para así saber onde baixar». Folgueira explica que moitos turistas teñen que preguntar e que «se non es de aquí, non sabes onde tes que baixar», resalta a nova.

«Tiven que preguntar onde estaba a liña 5»

Inmaculada Domínguez chegou a Santiago facendo o Camiño. Non tivo problema para acceder ata a estación de bus porque é recoñecible, conta. «Pero tiven que preguntar en Praza Galicia onde estaba a liña 5 porque non había nada visible. Non sabía en que dirección ía nin nada», explica a viaxeira, que tampouco sabía nada da existencia dunha aplicación para buses, a pesar de ter estado na Oficina de Turismo.

Tussa estuda incorporar avisos sonoros nos autobuses para precisar o nome das paradas

A empresa encargada do servizo de transporte urbano, Tussa, estudará incorporar un sistema de avisos sonoros no interior dos autobuses para anunciar o nome de cada parada.

A falta de indicacións terase en conta na nova concesión que, á espera de finalizar a súa redacción, aínda non ten establecida unha data concreta, segundo afirman desde Tussa.

A nova medida facilitaría o uso do transporte público e respondería as queixas e confusión que se producen entre os visitantes da cidade. Ademais, segundo a empresa, a mellora estaría enfocada non só aos turistas, senón tamén a todas aquelas persoas con algún tipo de discapacidade visual.

Deste xeito, a rede de transporte urbano de Santiago seguiría o ronsel doutras cidades tanto a nivel galego como de España. En Galicia, na Coruña e Vigo, os autobuses contan con pantallas electrónicas no seu interior, que introducen mediante un rótulo o nome escrito da seguinte parada e avisan ao pasaxeiro. A maiores, no caso da urbe viguesa, os vehículos contan con paneis que informan o usuario da dirección que segue a liña e o conxunto de paradas que a integran.