A rebaixa a cen metros da protección de costas axudará a «revitalizar» terreo en Dodro

A rebaixa de 200 a 100 metros da liña de protección de costas no municipio de Dodro, nas proximidades do río Ulla, nunha franxa comprendida entre o desvío de Lestrobe (no acceso á autovía da Barbanza) e o límite con Rianxo, é un dos temas «máis importantes» que ten por diante este Concello, segundo asegurou onte o seu alcalde, Valentín Alfonsín, que cualificou esa redución de «moi positiva».

Para aplicar esa rebaixa será necesario modificar de forma puntual o Plan Xeral de Ordenación Municipal (PXOM) de Dodro, aprobado en decembro de 2010, co fin de axustar o chan rústico de protección de costas á nova Lei do Solo de Galicia. Deste xeito, os 100 metros que se liberan pasarán a ser cualificados como chan agropecuario e, segundo explica o alcalde, con «usos normais» e menos limitacións. Así, por exemplo, os titulares das parcelas xa non terán que pedir permiso a Costas para actuar nelas, para limpalas ou cortar unha árbore, entre outros traballos.

Iso contribuirá, segundo engade Valentín Alfonsín, a «revitalizar» toda unha zona do concello que, na actualidade, «está un pouco abandonada» debido ás restricións que impón Costas aos titulares do terreo, ata o punto de que o alcalde fala de que a zona é unha «selva».

A maiores, en base ao criterio de rebaixa da liña de servidume de protección de costas, en Imo permite, segundo a Consellería de Ordenación e Territorio, unha nova «redelimitación» del núcleo, con lo que «se recoñecerán as vivendas existentes que estaban en solo rústico de protección de costas». Neste núcleo hai sete e oito casas fóra de ordenación, de acordo co rexedor.

Valentín Alfonsín reuniuse días atrás coa secretaria xeral de Ordenación do Territorio e Urbanismo, Encarnación Rivas, no que cualifica «unha primeira toma de contacto». O motivo do encontro foi, segundo o alcalde, «estudar as posibilidades da aplicación da nova Lei do Solo ao PXOM de Dodro». Tras esa primeira reunión, serán os técnicos «os que consideren as posibles modificacións e as súas implicacións», segundo explica o alcalde.

Pola súa banda, a representante da Xunta xa lle trasladou ao rexedor de Dodro a «viabilidade da iniciativa sempre e cando se limite a recoñecer o existente, e non supoña novos crecementos cara o mar».

O Concello fará, de acordo co alcalde, «unha proposta que resulte beneficiosa en termos xerais para os veciños e que ao mesmo tempo poida encaixar nas directrices de Urbanismo, aínda que isto non o saberemos con certeza ata que remate o procedemento e se someta á aprobación da Comisión Superior de Urbanismo». Respecto á tramitación, a modificación puntual do PXOM implica, entre outros trámites, a súa aprobación inicial polo pleno, exposición pública e solicitude de informes sectoriais. A consellería ofreceu ao Concello apoio técnico.

---

---