Nos Estados Unidos ha dado que falar un dispositivo que debería servir para velar pola saúde, pero que xera certos receos pola seguridade dos datos que captura e vale máis de 500 euros
06 dic 2025 . Actualizado á 05:00 h.A tecnoloxía de saúde doméstica vai ser unha tendencia crecente nos próximos anos, sobre todo se leva aparellada a etiqueta intelixencia artificial. E non vai ter fronteiras. Coarase ata no baño.
Hai tempo que temos básculas intelixentes. Nun futuro próximo poderemos gozar de duchas autónomas e parlantes, capaces de porse en marcha por si soas e de avisar cando acadan a temperatura preferida. E empezaron a comercializar nos Estados Unidos unha cámara para colocar no bordo do váter.
O dispositivo chámase Dekoda e fabricouno a compaña Kohler, que ten máis de 150 anos e é especialista en produtos de baño e fogares intelixentes. Costa máis de 500 euros (599 dólares) e logo hai que pagar unha subscrición mensual para acceder a unha plataforma de análise e informes, accesibles vía unha aplicación para móbiles. Que fai? A súa función principal é analizar os refugallos do usuario, tanto sólidos como líquidos, cos seus sensores ópticos avanzados e o seu software con intelixencia artificial.
O lema que acompañou a saída ao mercado do produto é: «Saber o que sae do teu corpo pode ser tan útil para manter un hábito de vida saudable como saber elixir o que metes en el». Non é un dispositivo médico. Non serve para diagnosticar enfermidades (sempre hai que ir ao médico).
Fai fotos do que cae ao baño? Si. Fai fotos e procésaas. E informa sobre posibles problemas de saúde. Como? Pode medir os niveis de hidratación dos ouriños e tamén detectar a presenza de sangue. Serve para varios usuarios e conta con sistemas para evitar mesturar información de diferentes persoas.
Que fai con datos que son tan sensibles como estes, extremadamente persoais, e que deberían de estar protexidos? Garante a privacidade? Segundo a compaña, están cifrados de extreme a extremo, pero hai moitas dúbidas sobre este aspecto.
Para empezar, os datos non quedan no dispositivo ou no smartphone do usuario, hai que subilos a unha nube na Rede para poder ser analizados pola IA de Kohler. En segundo lugar, esa información pode usarse para adestrar aos algoritmos da intelixencia artificial (aínda que segundo a empresa,faise de forma anonimizada). E a terceira grande incógnita ten que ver coa súa posible comercialización a outras empresas como farmacéuticas ou aseguradoras. Non hai unha resposta clara por agora. O debate está servido. E, non o dubiden, veremos moitos cacharros parecidos.