O frigorífico B5XRCNE366HXB conta cun sistema de iluminación que simula o ciclo solar diario, para preservar vitaminas en froitas e verduras. O motor inverter de velocidade variable axusta a súa potencia para consumir menos electricidade e arrefriar máis rápido.
06 ago 2025 . Actualizado á 08:07 h.As técnicas de refrixeración son case tan antigas como a humanidade, pero non foi ata finais do século XIX cando se inventou o primeiro frigorífico eléctrico e aínda habería que agardar unhas décadas (1913, Indiana, EE.UU.) ata que empezou a entrar nos fogares. Desde entón, este electrodomestico evolucionou para converterse nun das dispositivos claves en calquera vivenda moderna e actualmente existen modelos conectados a internet, cunha pantalla exterior para anotar a lista da compra ou incluso unha especie de fiestra que permite ver os alimentos conservados no interior. En España, a maioría das familias apostan polos denominados frigoríficos combi, un tipo de neveira que unifica nun só aparello a función de frigorífico na parte superior e a de conxelador na inferior. Son máis compactos, algo que se adapta ben ao espazo dispoñible nas cociñas estándar, e tamén ofrecen unha relación calidade/prezo moi vantaxosa. Pero iso non significa que non inclúan as tecnoloxías máis avanzadas e así o demostra a marca Beko co seu modelo B5XRCNE366HXB, que conta cun innovador sistema de iluminación que simula o ciclo solar diario.
O Beko B5XRCNE366HXB forma parte da serie bPRO500, posicionándose na gama media-alta de frigoríficos combi. No seu deseño primou a eficiencia, unha conservación avanzada de alimentos, silencio operativo e funcionalidades modernas. Cunhas dimensións de 186,5 centímetros de altura, 59,5 de ancho e 66,3 de fondo, ten unha capacidade total de 316 litros netos (210 litros para o frigorífico e 106 para conxelador) e o acabado exterior é look inox (cor gris aceiro), con tiradores invisibles integrados na parte inferior e superior de ambas as portas.
O repertorio tecnolóxico deste dispositivo é bastante impresionante, empezando polo seu sistema NeoFrost Dual Cooling: dous circuítos de refrixeración independentes, un para o frigorífico e outro para o conxelador, que evitan a mestura de cheiros, permite desconxelación automática e acelera o arrefriado. Pola súa banda, a función AeroFlow distribúe o aire frío de xeito homoxéneo por todos os compartimentos, evitando áreas máis cálidas e garantindo unha conservación uniforme en calquera zona.
Pero a xoia da coroa é o sistema HarvestFresh, que preserva as vitaminas e nutrientes de froitas e verduras durante máis tempo emulando o ciclo solar natural dentro dun caixón con iluminación especial. As luces de cores están inspiradas no sol e pasan de azul (amencer, estimula o arranque da fotosíntesis) ao verde (mediodía, representa a luz solar máis intensa) e o vermello (atardecer: mantén a fotosíntesis durante o crepúsculo). En horario nocturno, a luz do caixón apágase durante 12 horas, simulando a noite, aínda que se se abre a porta actívase momentaneamente.
Segundo Beko, tests de laboratorio realizados por Intertek revelaron que as vitaminas A e C en produtos como tomates, pementos verdes, cenorias, espinacas e apio consérvanse mellor con HarvestFresh (ata 5 días máis) en comparación con outros frigoríficos estándar. A marca insiste en que esta tecnoloxía atrasa a descomposición e reduce o desperdicio de alimentos, xa que os produtos duran máis e manteñen mellor textura e sabor; consome menos enerxía que sistemas de iluminación azul tradicionais (ata un 45% menos) e ofrece un ambiente visual agradable.
O compresor de tecnoloxía inverter é silencioso (35 decibeis) e unha garantía de durabilidade, grazas á súa capacidade para adaptar o traballo ás necesidades de temperatura. O motor inverter distínguese dos tradicionais porque evita os picos de enerxía e os cambios bruscos de rendemento, sendo capaz de regular a voltaxe, a corrente e a frecuencia ao momento. No caso dos frigoríficos utilízase un motor de velocidade variable para axustar a potencia de saída: regula o compresor para que, sen chegar a parar, diminúa a súa velocidade ata o mínimo necesario para manter a temperatura desexada; e se o que queremos é maior arrefriado, acelérao á máxima potencia para acadar rapidamente os graos seleccionados. Este tipo de compresores non se acenden nin se apagan bruscamente, o que permite unha refrixeración uniforme e constante, ademais dun menor consumo de enerxía. A redución dos arranques e as paradas tamén se traduce en menos ruído e menor desgaste dos compoñentes internos, o que prolonga a vida útil do compresor. Cunha etiqueta enerxética de clase C (norma 2010/30/UE), o consumo anual deste modelo de Beko sitúase entre 165 e 198 kWh ao ano.
Algúns detalles que nos gustaron deste frigorífico combi son a súa porta reversible, que fai que se adapte a cociñas con diferentes orientacións ou permite colocar varios frigoríficos xuntos grazas á función SmoothFit; os modos ECO e Vacacións, para unha mellor optimización enerxética cando non está en uso ou hai unha ausencia prolongada da vivenda; a conxelación rápida e alarma de porta aberta para maior seguridade, e a iluminación principal LED, que emite unha luz branca e non deixa zonas ás escuras.
Respecto á distribución, dispomos de catro estantes de vidro, tres balconeras na porta, un espazo para seis ovos, cubeta de xeo e o xa mencionado caixón HarvestFresh. Unha pantalla no interior indícanos a temperatura á que funcionan tanto a neveira como o conxelador, que conta con tres caixóns independentes.
Cun prezo de ao redor de 500 euros, este combi é unha boa opción para familias, con suficiente capacidade, organización práctica do espazo e baixo consumo. Ten unha autonomía de ata 11 horas en cortes eléctricos, polo que non perderemos os alimentos conservados no seu interior en casos de apagamentos prolongados como o do pasado mes de abril, e a marca ofrece estender a garantía ata dez anos de reparacións e recambios.
Beko pertence á multinacional Arçelik, con sede en Istambul e que se converteu nun dos maiores fabricantes de produtos electrónicos do mundo. Con 40.000 empregados e presenza nun centenar de países, das súas plantas saen equipos de televisión (no 2007 adquiriu a mítica compaña alemá Grundig), frigoríficos, lavadoras, aspiradoras, sistemas de aire acondicionado, portátiles, monitores e outros electrodomésticos.