A Garda Civil investiga un caso de acoso escolar en Poio e Educación protexe á vítima

A Garda Civil de Pontevedra está a investigar un caso de acoso escolar no IES de Poio. As dilixencias abríronse despois de que Educación, dentro do protocolo establecido, dese parte do ocorrido ao instituto armado.

Desde a Consellería de Educacón sinalaron que hai un protocolo antiacoso activado no citado centro educativo e que está en marcha o procedemento corrector, ademais das pertinentes «medidas de protección á vítima».

A consellería indicou que, dentro do plan director para a convivencia e seguridade nos centros educativos, contactouse coa Garda Civil e que tamén se deu traslado deste asunto aos Servizos Sociais do Concello de Poio. Por tanto, segundo a Xunta, «tanto o centro como a inspección educativa están a actuar de acordo co protocolo establecido para solucionar esta situación canto antes».

Desde a Xunta de Galicia sinalouse tamén: «Reiteramos a tolerancia cero ante este tipo de condutas e apelamos ao compromiso colectivo fronte a comportamentos contrarios á convivencia para seguir actuando con eficacia e dilixencia ante calquera caso que se produza». 

---

---

---