As novas luces forman parte dunha intervención máis ampla para pór en valor o viaduto
17 dic 2025 . Actualizado á 20:19 h.Unha nova iluminación realza a beleza e reforza a seguridade viaria de peoas e condutores na ponte medieval de Ponte Sampaio, en Pontevedra, unha plataforma que conecta o municipio con Soutomaior a través da estrada PO-264. A conselleira de Vivenda e Planificación de Infraestruturas, María Martínez Allegue, e o alcalde da cidade, Miguel Anxo Fernández Lores, asistiron este luns pola tarde á estrea da iluminación, que se estende polo muro e o exterior da ponte con máis de medio centenar de luces led.
En concreto, segundo detalla o departamento da Xunta, dispuxéronse 20 luminarias led nos tallamares; encaixadas no muro de pedra; e iluminación ornamental, con 36 proxectores led. A iluminación forma parte da obra de posta en valor da ponte medieval, que implica un investimento próximo aos 500.000 euros. Unha intervención que se prevé remate a próxima primavera. Inclúe labores de conservación, renovación de pavimentos, a substitución dunha varanda, zonas de axardinamento ou a limpeza de paramentos exteriores da ponte.
Desde a consellería explicaron que os traballos avanzan a bo ritmo, quedando pendente de executar o empedrado, a colocación de laxas nun lado da ponte e o aglomerado dun tramo da travesía na zona de Pontevedra. O seu titular comentou que tanto a iluminación como a intervención foron deseñadas «coa máxima esixencia e coidado e co selo Galicia Calidade». Destacou María Martínez Allegue a súa importancia ao ser un lugar de paso de veciños, pero tamén de miles de peregrinos que fan o Camiño.