R. Domínguez: «Verte con 13 puntos é case un terzo do traballo feito»
PONTEVEDRA
O técnico confirmou a baixa de Juanra Gómez e a dúbida de Joao Resende
11 oct 2025 . Actualizado á 05:00 h.O Pontevedra visita este domingo (12.00 horas) ao Real Madrid Castela en Valdebebas coa oportunidade de encadear a súa terceira vitoria consecutiva en Liga. Na previa, o adestrador granate, Rubén Domínguez, repasou a situación do equipo, as baixas que condicionan a convocatoria e a dificultade de medirse a un filial que, nas súas palabras, «é unha selección mundial de xogadores».
Sobre o estado físico do seu persoal, Domínguez confirmou que «Juanra vai estar case descartado. A ver se pode ir en convocatoria para o día de mañá, agardemos que o seguinte partido na casa si que xa estea. Tamén temos a João tocado, que imaxinamos que vai viaxar, pero tamén está tocado. Ademais da baixa de Hervías». O técnico explicou con máis detalle a situación do defensor: «Juanra notou un toquecito atrás, pensamos que era contractura, por iso tiñamos a dúbida, logo coas probas había unha micro cava pequeniña. Ao final, ao ser unha zona perigosa para esprintar, si que está descartado para o domingo». En canto a João, aclarou que «é unha torcedura de nocello e hoxe (polo venres) non puido adestrar. A ver a evolución durante o día de mañá, se pode viaxar».
Preguntado polos horarios da Copa e os tres partidos nunha semana que terá a finais deste mes, Domínguez restou importancia a ese asunto: «De momento temos a cabeza posta en Madrid, iso chegará dentro de dúas semanas. Afrontarémolo con ilusión, porque ao final queremos traer fútbol de equipos profesionais a Pasarón e queremos seguir dando alegrías en Liga».
Sobre o rival deste domingo, o Real Madrid Castela, o ourensán foi claro: «A nivel de nomes quizais sexa máis fiable o día de Ponferrada, porque os outros días hai xogadores que xa están no Mundial: o xogador italiano e os cinco da selección española. Ao final, sexan do Real Madrid C, sexan do xuvenil, sexan os xogadores que suban máis os que están no Madrid B, é unha selección mundial». E engadiu que agardan a «un rival que a nivel individual é moi bo e logo, no colectivo, sobre todo a nivel ofensivo, fan cousas que hai que contrarrestar».
Un obxectivo moi claro
O adestrador lembrou ademais a oportunidade que se presenta esta fin de semana: «Temos a primeira oportunidade de lograr tres vitorias consecutivas. Verte na xornada 7 con 13 puntos, non chega ao terzo, pero é case un terzo do traballo feito».
Domínguez insistiu na necesidade de manter a perspectiva: «Os xogadores saben onde están, ao final somos un equipo construído con determinados salarios. Estamos no presuposto medio-baixo e o obxectivo é a salvación, non sei se van ser 43 puntos, 44, 45 ou 47. Pomos a referencia de 45 porque creo que nos últimos catro anos chegaron, pero é unha referencia. Unha vez que consigamos esa salvación, pois soñar, pero primeiro hai moito que remar».
A Copa o 29 de outubro ás 20.30 e contra o Zamora o 1 de novembro ás 14.00 horas
A Real Federación Española de Fútbol continúa avanzando os horarios das próximas xornadas de competición e este venres tocoulle a quenda á décima data do calendario ligueiro, a correspondente á primeira fin de semana de novembro e á primeira eliminatoria de Copa do Rey.
O cruzamento copeiro ante a VDE Ourense será o mércores 29 de outubro ás 20.30 horas no Couto. En canto á liga, os granates teñen un horario de terror para ese día de Samaín. Tras varias semanas esquivando as horas máis delicadas da repartición de grella que as plataformas televisivas fan en Primeira Federación, ao Pontevedra tocoulle nesta décima xornada a fiestra das dúas da tarde. O sábado 1 de novembro a esa hora tan inusual das 14.00 horas o equipo adestrador por Rubén Domínguez verase as caras contra o Zamora.
Este cruzamento é delicado, pois lle chegará aos de Pasarón uns poucos días despois de ter que xogar a súa primeira eliminatoria de Copa do Rey contra a VDE Ourense, marcada no calendario entre a saída o Carballiño para o derbi contra o Arenteiro (domingo 26 de outubro ás 12 horas) e esta visita dos zamoranos ao feudo pontevedrés. Os branquivermellos son agora mesmo sétimos na clasificación cun punto menos que o Pontevedra.