Lores traslada este venres ao Consello Superior de Deportes o veto de Pontevedra a Israel
PONTEVEDRA
Aproveita que viaxa a Madrid para recoller en nome do Concello o diploma de honra da Federación Española de Natación
02 oct 2025 . Actualizado á 19:13 h.O alcalde de Pontevedra, Miguel Anxo Fernández Lores (BNG), manterá este venres unha reunión na sede do Consello Superior de Deportes, en Madrid, para trasladar de xeito persoal o veto aprobado polo Concello á participación de representantes do Estado de Israel en calquera evento deportivo que se desenvolva na cidade.
Foi o pleno municipal o que o pasado 22 de setembro acordou, cos votos a favor do PSOE e do BNG e o rexeitamento do PP, «non acoller no Concello de Pontevedra ningún evento de carácter deportivo, cultural ou doutra índole na que participen entidades que representen ao Estado de Israel ou que sexan financiados por el, así como aqueles que contribúan a promocionar ou branquear o xenocidio que se está cometendo sobre o pobo palestino; e solicitar do COI a exclusión do Estado de Israel das competicións internacionais nas que participe».
Tras o pleno do 22 de setembro Lores trasladou por carta a decisión de Pontevedra tanto ao CSD como ao os presidentes dalgunhas federacións, especialmente os de tríatlon e natación, xa que Pontevedra acollerá nos 2026 eventos internacionais de ambas as: en marzo unha Copa do Mundo de natación artística e en setembro, a gran final das series mundiais de tríatlon.
Ademais, o propio alcalde e outros integrantes do goberno local manifestaron a súa confianza en que Israel sexa excluído polo Comité Olímpico Internacional de calquera evento deportivo. Un pronunciamiento que non só non se produciu aínda senón que desde o COI se descartou expresamente hai unhas semanas.
Posteriormente foron a FIFA e a UEFA os que exploraron a posibilidade vetar aos equipos de Israel, pero esta posibilidade freouse tras a proposta de acordo para frear a acción armada sobre a franxa de Gaza feito público esta semana polo presidente dos Estados Unidos, Donald Trump.
Lores aproveitou que este venres pola tarde ten un acto na sede do Comité Olímpico Español —onde Pontevedra recibirá un diploma de honra da Federación Española de Natación pola súa contribución ao impulso deste deporte, con 75 campionatos organizados na cidade en tres anos— para concertar unha cita no CSD co fin de trasladar en persoa ese posicionamento do Concello.
A reunión será pola mañá e Lores reunirase con membros do gabinete do presidente do CSD, José Manuel Rodríguez Uribes. Este non asistirá por atoparse hoxe fóra de Madrid.
Apoio á flotilla
Doutra banda, o goberno local de Pontevedra aprobou este xoves un acordo formal para expresar o seu «repulsa polo ataque perpetrado polo Estado de Israel contra a flotilla solidaria que se dirixía a Gaza». Nel cualifícase a acción como de «retención ilegal de activistas» e considérase que supón «unha «vulneración grave do dereito internacional».