Condenado un acusado de 87 anos tras ofrecer diñeiro a unha nena de 10 anos por un bico
PONTEVEDRA
Ademais do ano de prisión, a Audiencia de Pontevedra impúxolle cinco de liberdade vixiada
01 abr 2025 . Actualizado á 19:08 h.Un acordo de conformidade co fiscal evitoulle o que popularmente se coñece como pena de banco, pero non impediu que finalmente fose condenado, neste caso, a un ano de prisión, como autor dun delito de corrupción de menores. Á hora de impor esta pena aplicáronselle as circunstancias atenuantes de reparación do dano e analóxica de confesión do feito.
Deste xeito, o pontevedrés, que na actualidade ten 87 anos, recoñecido que, minutos antes das seis da tarde do 13 de xaneiro do 2023, circulaba por unha localidade do partido xudicial de Cambados —os datos concretos das identidades e localidades foron omitidos para salvagardar á vítima, menor de idade— cando se decatou da presenza dunha nena de 10 anos sentada nun banco. O acusado, que ata ese momento carecía de antecedentes penais, detivo o seu vehículo ao seu lado para ofrecerlle unha cantidade de diñeiro —entre 10 e 50 euros, segundo recolle a sentenza declara firme— «a cambio de que se subise con el ao seu vehículo para bicala».
A Audiencia de Pontevedra refire que o procesado actuou do xeito que o fixo «coa finalidade de satisfacer o seu apetito sexual». En todo caso, a menor rexeitou esta proposta e o acusado marchou. Posteriormente, a nai da nena interpuxo a correspondente denuncia ante a Garda Civil.
Confesou os feitos
A resolución refire que o acusado recoñeceu os feitos en presenza xudicial e consignou mil euros en concepto de danos morais para a menor, sendo esta cantidade aceptada como suficiente pola súa proxenitora en calidade de representante legal da nena. En todo caso, o cumprimento do ano de prisión suspendeuse por un prazo de dous anos a condición de que non volva delinquir neste prazo.
A maiores do ano de cárcere, impúxoselle a prohibición de comunicarse ou aproximarse a menos de 250 metros da vítima durante dous anos e medio, así como cinco anos de liberdade vixiada. Igualmente, decretouse a inhabilitación especial para o exercicio do ensino a menores de idade e de calquera profesión ou oficio, sexa ou non retribuído, que implique contacto regular e directo con menores de idade por tempo de seis anos.