Abel Losada cifrou en case corenta millóns o investimento na provincia para «implantar solucións de dixitalización nas empresas e pequenos negocios».
18 jun 2024 . Actualizado á 16:45 h.Na actualidade, a máis de 9.500 empresas da provincia de Pontevedra xa lles foi concedido o bono do programa Kit Dixital posto en marcha polo Goberno de España con fondos europeos do Plan de Recuperación. Así o puxo de manifesto este martes en Ponte Caldelas o subdelegado do Gobierno en Pontevedra, Abel Losada, quen cifrou en case corenta millóns de euros o investimento na provincia para «implantar solucións de dixitalización nas empresas e pequenos negocios pontevedreses».
No transcurso dunha visita á carpintería Ceyeda, «empresa referente no sector que nos últimos dez anos tivo unha proxección notable de crecemento e que tras a crise da COVID-19 decidiu darlle un empurrón á súa estrutura dándolle un peso moi importante a dixitalización de procesos», Losada destacou que grazas ao programa estatal puido mellorar o seu web adaptándoa aos tempos actuais, «dándolle unha visión mellorada, cunha páxina máis dinámica e actualizada».
Neste sentido, precisou que esta sociedade empezou como unha pequena carpintería en Vilaboa para posteriormente trasladarse a Marín ata adquirir a actual nave na Reigosa. «Con 65 empregados e 3,6 millóns de facturación, exporta a Canadá, Francia, Bélxica e Portugal, producindo solucións de mobiliario para diferentes franquicias do mundo da hostalaría e outras empresas», precisaron desde a Subdelegación.
Engadiron que, no relativo á xestión de procesos, «implantou o portal do empregado, unha webservice que se lle dá aos traballadores da empresa para a descarga de documentos como nóminas, anuncios...». De igual modo, puxo en marcha un software de control de entradas e saídas de persoal e activou un programa de control por xeolocalización a través dos móbiles de presenza dos xefes de equipo nas obras onde montan os seus produtos. Así mesmo, «melloraron a xestión de redes sociais coa publicación de temas e noticias en Linkedin que dan a coñecer a empresa e permiten chegar a futuros clientes», apuntaron respecto diso desta firma.