O Concello comezará a recoller subministración dos ríos Avia e Miño
11 ago 2022 . Actualizado á 21:33 h.O Concello de Ribadavia acaba de declarar o nivel cero do plan de emerxencias municipal e a alerta por seca, debido ao empeoramento da situación do depósito da Fraqueirán que se abastece do río Maquiáns, hoxe seco. Pasou unha semana desde as primeiros cortes e os traballos de recuperación do caudal levados a cabo, de día e de noite, non foron suficientes. A empresa concesionaria, Aqualia, afirma que xa non pode garantir o servizo.
O consumo de auga en Ribadavia rolda os 500.000 litros en cada apertura -hai dúas ao día- o que significa que salgue máis auga da que entra e que agora mesmo procede de depósitos dos concellos limítrofes de Beade e Carballeda de Avia, que se prestaron a colaborar con Ribadavia. «Agora mesmo non podemos garantir a agua para mañá. Tivemos á mañá, pero ó mellor pola tarde xa non hai. A situación é crítica», sinalaba este xoves a alcaldesa, Noelia Rodríguez.
Para paliar a falta de subministración, o Concello xa estableceu máis de 25 puntos de repartición de auga en todo o municipio. Uns depósitos fixos na rúa para uso doméstico. Non é potable, só está prevista para a hixiene e a limpeza. A maiores, Aqualia prosegue coa repartición de auga embotellada.
Aínda que se vai a intentar manter o mesmo horario de apertura, dúas horas pola tarde e dúas pola mañá, desde o Concello sinalan que non se descarta deixala reducida nunha franxa horaria. Dependerá da cantidade de auga que poida almacenar o depósito, polo que apelan á concienciación cidadá.
Co visto e prace da Xunta e a Confederación Hidrográfica do Miño-Sil, o Concello de Ribadavia comezou hoxe a coller auga dos ríos Miño e Avia, que chegará ao depósito ribadaviense para ser tratada. Nese sentido, e co plan de emerxencia por seca, o Concello lembra que todas as administracións están obrigadas a dotar de medios ao Concello para poder levar a cabo estes traballos. Agora mesmo necesitan camións cisterna e motobombas para poder recoller o maior número de litros de auga.