O Barco gañou en Celanova e espera adversario para o duelo decisivo do torneo provincial

A Copa Deputación achégase ao seu desenlace e o Barco converteuse no seu primeiro finalista, despois de impoñerse a domicilio en Celanova, cun convincente 0-2.

Os valdeorreses aguantaron ben o tirón dunha pugna rifada no seu primeiro período, que lograron encarrilar grazas ao tanto de Óscar Martín, ao fío do descanso. A escuadra de Anxo Mociño intentou revivir as súas opcións na segunda metade, pero Manu Rodríguez volveu acertar para os visitantes, que fixeron valer o seu bo manexo do balón para manter esa renda e levar a bo porto unha contenda na que se viron arroupados por un bo número de seguidores, que viaxaron ata o Municipal de San Rosendo.

José Arjiz

A segunda semifinal do torneo que chega á cota das 43 edicións disputarase en Verín, onde os locais reciben ao Velle (José Arjiz, 18.00 horas), medindo así as forzas do cadro local, recentemente ascendido á Preferente e un visitante que regresará a Primeira Galicia, tras o seu descenso.

---

---

---