Os balnearios de Ourense abrirán en decembro ofrecendo estancias termais a persoas que vivan soas
OURENSE
A Deputación de Ourense presentou en Termatalia o programa TERnadal, con estancias de ata 15 días para combater a soidade non desexada
28 sep 2025 . Actualizado á 05:00 h.Un milleiro de persoas de toda España poderán participar en TERnadal, o novo programa piloto da Deputación de Ourense que ofrece estancias termais durante o mes de decembro co obxectivo de combater a soidade non desexada. O programa está dirixido a persoas que se atopen en situación de vulnerabilidade emocional ou que sufran soidade non desexada, con independencia do seu lugar de residencia, e que desexen pasar as festas en compaña. O responsable da área de Benestar do organismo provincia, José Juan Cerdeira, presentou a iniciativa en Termatalia, en Colombia.
As estancias desenvolveranse en distintos hoteis-balneario da provincia e poderán ter unha duración de seis, dez ou quince días. Inclúen aloxamento en réxime de pensión completa, acceso a piscinas de auga mineromedicinal, dúas técnicas termais diarias, actividades deseñadas para favorecer a socialización e, de forma opcional, consulta médica. Ademais, programáronse quendas especiais en datas sinaladas como Nadal, Fin de Ano ou Reis, co fin de que os participantes gocen destas celebracións acompañados.
A inscrición está aberta desde o 24 de setembro e pode realizarse a través da páxina web de Termalismo Ourense. A Deputación presentou esta iniciativa coincidindo coa inauguración de Termatalia, a Feira Internacional de Turismo Termal e de Saúde, como arranque dunha campaña de difusión a nivel nacional. Cerdeira defendeu que así Ourense se converte nun laboratorio de políticas públicas que combinan termalismo e benestar emocional. Se a experiencia piloto resulta positiva, a intención é que o programa se estenda en 2026 a outras Vilas Termais da Federación Española de Municipios e Provincias, o que permitiría ampliar tanto o número de balnearios abertos en decembro como o de beneficiarios. Ademais, o proxecto contribuirá a dinamizar a economía provincial ao manter a actividade dos balnearios nun mes no que tradicionalmente permanecían pechados.