O mozo grupo acaba de lanzar o seu novo proxecto para actuar en cerimonias nupciais ou cócteles
02 ago 2025 . Actualizado á 05:00 h.A música nas vodas é un dos elementos centrais. Diso encárgase o mozo grupo Divisi Ensemble, composto polo piano de Roi Lago, o violín de Martín González e a voz de soprano de Cecilia Rodríguez, natural de Vigo o primeiro, e de Ourense os demais.
O violinista, que comezou os seus estudos no Conservatorio de Ourense, do mesmo xeito que Cecilia, onde se coñeceron, coincidiu con Roi ao seu paso por Vigo para a aprendizaxe musical. Os ourensáns continúan a súa formación no Conservatorio Superior de Música de Madrid, mentres que o pianista se decantou polo Conservatorio Superior de Música de Castela e León, en Salamanca. A idea de crear unha agrupación para pór música en vodas e cócteles xurdiu de Martín e Cecilia, que non dubidaron en contactar con Roi para proporlle que se unise como terceiro integrante.
Aínda que recentes como formación musical, os tres teñen experiencia previa en orquestras e grupos de cámara, pero tiñan ganas de penetrarse no mundo laboral. «É unha moi boa oportunidade para gañar experiencia e sobre todo para ampliar o repertorio e saír desta zona de confort que é a música clásica», explica o pianista Roi.
Pero eles teñen algo que os diferencia doutras agrupacións especializadas neste tipo de eventos. «Non quixemos chamarlle trío porque eu [Cecilia] de cando en vez collerei o violín ou cantarei, todo pode variar un pouco, faremos dúos, tercetos ou incluso sós. Podemos dar bastante xogo», afirma a soprano do grupo.
Os seus instrumentos e a posibilidade de poder contar ou non cunha voz para os diferentes temas permite aos tres mozos músicos gozar dun repertorio bastante amplo, e incluso poder adaptar cancións solicitadas por quen os contrate. «Hai moito prexuízo de que quizais os nosos instrumentos son máis de música clásica, pero realmente pódese tocar calquera cousa, hai arranxos moi bos», matiza o seu violinista, Martín.
Da versatilidade e capacidade de repartirse para as diferentes pezas nace o nome do grupo, dous termos propios do vocabulario musical. «Ensemble, porque podemos ser un dúo ou podemos ser un trío segundo a situación ou a obra», comeza Martín. «Divisi úsase para as grandes agrupacións, cando se divide a parte de certa sección, como por exemplo de corda, que é un pouco o que facemos nós, igual estou eu con Roi ou igual están Cecilia e Roi», remata o violinista.
A pesar de vivir en diferentes cidades, os integrantes aseguran que ensaiar e prepararse os temas non é complicado. «Hai moito traballo individual, logo cando quedamos xa se monta só. Non adoita haber moito problema», apuntan. Aínda que se trata dun proxecto recente e non tocaron en ningunha voda ou cóctel, si que lles contactaron para que poñan música a estas cerimonias, que máis auxe gañan durante o verán. «Estamos xa ansiosos por empezar», recoñece Roi en nome de todos.