O cociñeiro Paco Roncero, con dúas estrelas Michelin, descubriu no Fórum Gastronómico de Barcelona o godello de Roberto Verino
OURENSE
Cinco asinas ourensás, entre elas o grupo Coren, desprazáronse a Cataluña para participar na cita da man de Galicia Calidade
08 novs 2023 . Actualizado ás 05:00 h.Un total de 26 empresas de Galicia participan no Fórum Gastronómico de Barcelona promocionando a calidade dos produtos galegos. O músculo gastronómico de Ourense está representado por cinco asinas da provincia. O grupo Coren, A Central Heladera e as adegas Gargalo, A Coroa e Viña Costeira achegaron os seus produtos á capital catalá baixo a marca Galicia Calidade. Os asistentes á cita tamén poderán degustar pan de Cea, presente por ser unha indicación xeográfica protexida.
A feira, que supón un punto de encontro internacional, remata este mércores. Ata ese momento, as empresas ourensás están a ser protagonistas de catas, degustacións e exhibicións en directo. Coren aproveitou para compartir cos visitantes os produtos da gama de porcos alimentados con castaña. De feito, a cooperativa está a celebrar o décimo aniversario da saída ao mercado do seu xamón Selecta, que pertence a esta liña.c
Son moitos os visitantes que se achegaron ao posto da Central para probar os xeados artesáns que realiza esta empresa ourensá, que presentou en Barcelona un xeado da cervexa 1906, entre outros.
Ao salón acoden críticos, distribuidores e tamén chefs nacionais e internacionais. O cociñeiro Paco Roncero, con dúas estrelas Michelin, visitou este martes o Fórum Gastronómico para dar unha conferencia sobre innovación e aproveitou a súa estancia para achegarse por o expositor de Gargalo. «Estivo un intre connosco e probou o godello. Falamos un pouco de como aplicar a innovación ao sector vitivinícola», afirma Tito Levoso, asesor da adega de Roberto Verino, que asegura que está sendo unha feira exitosa e con alta participación.